ახალქალაქი-კარწახის საერთაშორისო მნიშვნელობის საავტომობილო გზის კარწახიდან ახალქალაქის მიმართულებით დაახლოებით 1 კმ და 700 მეტრი სიგრძის მონაკვეთზე, სარეაბილიტაციო სამუშაოები კვლავ განახლდა.
გასათვალისწინებელია, რომ ამ მონაკვეთის დემონტაჟი მარტში დაიწყო სარემონტო სამუშაოების მიზნით, თუმცა მას შემდეგ სამშენებლო სამუშაოები რამდენიმე დღის დაწყებისთანავე კვლავ წყდებოდა.
კარწახი-ახალქალაქის საავტომობილო გზის მე-8+800-დან მე-16+000 კმ-მდე მონაკვეთის რეაბილიტაციას კომპანია „არალი“ ახორციელებს. ხელშეკრულება კომპანიასთან 2025 წლის 16 მაისს გაფორმდა, პროექტის საერთო ღირებულება კი 7 278 560.00 ლარს შეადგენს.
კომპანია „არალის“ კომენტარი
ჯერ კიდევ 1-ელ ივლისს, კომპანია „არალის“ დირექტორის მოადგილემ, ეკა თათეშვილმა Jnews-ს განუცხადა, რომ გზის კაპიტალური შეკეთების სამუშაოების დაწყება დამოკიდებული იყო საქართველოს საავტომობილო გზების დეპარტამენტის მიერ მიწოდებულ წერილობით მითითებაზე.
„მითითების მიღებისთანავე, მოსამზადებელი ეტაპის განსახორციელებლად, ადგილზე გავაგზავნეთ სპეციალიზებული ჯგუფი. შესწავლილი იქნა გზის მდგომარეობა და შედგენილი იქნა ტექნიკური მონაცემები. უახლოეს დღეებში გადაადგილდება პერსონალი და სამშენებლო ტექნიკა პირველი ეტაპის დასაწყებად“, – განაცხადა ეკა თათეშვილმა.
განათებისა და ტროტუარების პრობლემა
გზის ცუდი მდგომარეობის გარდა, სოფელ კარწახში სერიოზული პრობლემაა განათებისა და ტროტუარების არარსებობა. სოფლის ერთ-ერთმა მცხოვრებმა, რომელმაც ვინაობის გამხელა არ ისურვა, განაცხადა:
„წელიწადზე მეტია, რაც ჩვენი სოფლის გზა სავალალო მდგომარეობაშია. რემონტის დროს ყველა ელექტრო ბოძი მოხსნეს, მაგრამ დღემდე ახლები არ დაუყენებიათ. ღამით სოფელში სიარული ძალიან რთულია, რადგან ბნელა. ტროტუარებიც არ გვაქვს. სკოლის მოსწავლეებს ამ გზით უწევთ სიარული და მანქანებს შორის გავლა. არც გამაფრთხილებელი ნიშნებია, რომლებიც მძღოლებს ეტყვის, რომ გზაზე ბავშვები არიან. ღმერთმა ნუ ქნას, ბავშვს რამე დაემართოს, ვინ აგებს პასუხს? თუნდაც ხელოვნური ბარიერები დაამონტაჟონ, რომ სოფელში მანქანებმა მაქსიმუმ 40 კმ/სთ სიჩქარით იმოძრაონ. ახლა სატვირთო მანქანები სოფელში 70-80 კმ/სთ სიჩქარით დაფრინავენ“.
კარწახელების იმედი
სოფელ კარწახის მოსახლეობა იმედოვნებს, რომ ამჯერად სარემონტო სამუშაოები დასრულდება. გარდა ამისა, ისინი მოელიან, რომ გზის უსაფრთხოებასთან დაკავშირებული პრობლემებიც მოგვარდება, რაც როგორც მძღოლების, ისე ქვეითების უსაფრთხოებას უზრუნველყოფს.
ტრანზიტული სატვირთო მანქანების ნაკადი გაიზარდა
უკრაინაში ომის დაწყების შემდეგ, ახალქალაქი-კარწახის გზაზე გამავალი სატვირთო მანქანების ნაკადი მნიშვნელოვნად გაიზარდა. ათობით და ასობით მძიმე ტვირთით დატვირთულ მანქანას უწევს ორმოებით სავსე გზაზე ერთმანეთისთვის გზის დათმობა.
ამავდროულად, საქართველოში ტრანზიტული გზის გადასახადიც გაიზარდა. თუ 2022 წლის 20 ივნისამდე სატვირთო მანქანების მძღოლები ან სატრანსპორტო კომპანიები 200 ლარს იხდიდნენ, ახლა გადასახადი 350 ლარამდე გაიზარდა.
