თავიაუფლების ქუჩის 11 მისამართზე სამსართულიანი საცხოვრებელი კორპუსის ფასადისა და შემოგარენის რეკონსტრუქციის თანხა 11 103 ლარით გაიზარდა. დღეს საკრებულოს სამი კომისიის სხდომაზე დეპუტატებმა სხვა საკითხებთან ერთად ეს საკითხიც განიხილეს.
თავისუფლების ქუჩაზე სამსართულიანი საცხოვრებელი კორპუსის ფასადისა და შემოგარენის რეკონსტრუქციის ტენდერი მერიამ შარშან ოთხჯერ გამოაცხადა და ოთხივეჯერ ტენდერი მონაწილეთა არარსებობის გამო არ შედგა.
თავიაუფლების ქუჩაზე ფასადის განახლებისა და ავტოსადგომის აშენების მეოთხე მცდელობა
გასულ წელს ახალქალაქის მუნიციპალიტეტის ინფრასტრუქტურის, არქიტექტურისა და სამშენებლო სამსახურის უფროსმა, არა მოვსისიანმა JNEWS-თან საუბარში თქვა, რომ ჩავარდნილი ტენდერების მიზეზი შეიძლება იყოს როგორც მომუშავეების ნაკლებობა, ასევე ფასადის სამუშაოების შესრულების სიძნელე, მაგრამ არა ტენდერის ფასი და მოთხოვნები.
თუმცა, წელს მერიამ შენობის რეკონსტრუქციის თანხა 11 103 ლარით გაზარდა. გასულ წელს ტენდერში სამუშაოების მოცულობა 248 897 ლარი იყო, წელს მერიამ 260 000 ლარი გამოყო. ამ თანხას, სავარაუდოდ, ხვალ სხდომაზე ახალქალაქის მუნიციპალიტეტის საკრებულოს დეპუტატები დაამტკიცებენ.
შეგახსენებთ, რომ თავისუფლების ქუჩაზე მდებარე სამსართულიანი კორპუსი სავაჭრო ცენტრ Nane Mall-ის მოპირდაპირედ მდებარეობს. რეაბილიტაციის ფარგლებში იგეგმება შენობის ქუჩისა და ეზოს მხრიდან ფასადის კოსმეტიკური რემონტი, მოაჯირებით აივნების გარემონტება, სკამების დამონტაჟება და განათება. ასევე, ტენდერის მიხედვით, ტროტუარის შემცირებით შენობის წინ პარკინგის ადგილის გათავისუფლებაა დაგეგმილი.
