მიუხედავად იმისა, რომ ახალქალაქის გზებზე ყოველწლიურად ტარდება ორმოების გასწორების სამუშაოები, ქალაქში მაინც არის ქუჩები, სადაც მოძრაობა გაძნელებულია გზაზე გაჩენილი ორმოებისა და უსწორმასწორობების გამო.Jnews-მა სცადა გაერკვია, გეგმავს თუ არა ქალაქის მერია წელს თბილისის ქუჩაზე კაპიტალური ან ორმოების შეკეთების სამუშაოების ჩატარებას.
თბილისის ქუჩა დანგრეულ მდგომარეობაშია. მრავალი წლის წინ გზა გარემონტდა და მოასფალტდა, დღეს კი ისევ დანგრეულია. წარმოქმნილი ორმოების გამო მძღოლები ამ გზაზე მოძრაობას ერიდებიან, რადგან არსებული დარღვევები აზიანებს ავტომობილებს, ორმოების გამო კი ხშირად მოძრაობის წესები ირღვევა. მოსახლეობა ამბობს, რომ გზის მდგომარეობა მას შემდეგ გაუარესდა, რაც სატვირთო მანქანებმა დაიწყეს მოძრაობა.
ხელისუფლება უკვე მრავალი წელია პირდება, რომ ამ ქუჩაზე ორმოების გარემონტების სამუშაოები ჩატარდება, მაგრამ ეს არასდროს მომხდარა. ასფალტის დაზიანების ერთ-ერთი მიზეზი ისიც იყო, რომ ამ ქუჩაზე წყლის მილების გარემონტრბა-აღდგენის აუცილებლობა არის.
თბილისის ქუჩა უიმედო მდგომარეობაშია
მოსახლეობამ არაერთხელ გამოთქვა უკმაყოფილება. ხშირად, მძღოლებს ტროტუარებზე უწევთ მოძრაობა, რათა თავიდან აიცილონ ორმოები.
ამ ქუჩის ერთ-ერთმა მცხოვრებმა, რომელმაც ანონიმურად დარჩენა მოისურვა, თქვა:
„თავიდან, როცა გზა ახლახან მოაასფალტეს, ყველაფერი კარგად იყო, მაგრამ შემდეგ დროთა განმავლობაში ჩამოინგრა და ამგვარი გახდა“.
გზა საკმაოდ დიდი ხანია ამ მდგომარეობაშია და ადგილობრივი მოსახლეობა უკვე „მოერგო“ ორმოებს.
„გზა კარგია, არაფერია ადრე ესაც არ გვქონდა…” – იხუმრა თბილისის ქუჩის ერთ-ერთმა მცხოვრებმა, რომელმაც ასევე სახელის დასახელება არ ისურვა.
სატვირთო მანქანების მუდმივი მოძრაობა და დაზიანებული წყლის მილები გზის მდგომარეობას დღითი დღე აუარესებს. ამ ქუჩაზე ჭაბურღილების არსებობა ართულებს მანქანების გადაადგილებას. საბურავები, რომლებიც ფარავს ლუქებს, მძღოლებისთვის მცირე “საშველია”.
Jnews-მა ახალქალაქის მუნიციპალიტეტის ინფრასტრუქტურის, არქიტექტურისა და სამშენებლო სამსახურის უფროსს, არა მოვსისიანს ჰკითხა, იგეგმება თუ არა ამ ქუჩაზე უახლოეს მომავალში ორმოების გარემონტება ან რეკონსტრუქცია?
„ჩვენ გვინდა, რომ თბილისის ქუჩა სრულად გარემონტდეს, მაგრამ პრობლემას წყალმომარაგების გამოცვლა წარმოადგენს. ყოველივე შემთხვევაში, ორმოების შეკეთება წელს განხორციელდება. ტენდერი უკვე გამოცხადდა, განაცხადების მიღების ბოლო ვადა 27 თებერვალია. სამუშაოები გაზაფხულზე, მარტ-აპრილში დაიწყება, როცა ამინდის პირობები მოგვცემს ამის საშუალებას“, – გვაცნობა არა მოვსისიანმა.
Jnews-მა არაერთხელ დაწერა თბილისის ქუჩაზე არსებული ორმოების შესახებ. ახალქალაქის მუნიციპალიტეტის ეკონომიკური განვითარებისა და ქონების სამსახურის უფროსმა მნაცაკან ფამბუხჩიანმა Jnews-თან საუბარში თქვა, როდის შეიძლება ველოდოთ თბილისის ქუჩის მოასფალტებას.
„წელს გვაქვს პროგრამა, რომელსაც „საქართველოს გაერთიანებული წყალმომარაგების კომპანია” განახორციელებს. ახალქალაქში წყლის ხაზები შეიცვლება. თუ წელს ვერ დაასრულებენ, მომავალ წელს გააგრძელებენ. ამისთვის წყალგაყვანილობის ხაზები უნდა გაითხაროს, რაც გზებს დააზიანებს და ამის შემდეგ იგეგმება ასფალტის გაკეთება“, – თქვა მნაცაკან ფამბუხჩიანმა.
ზემოაღნიშნულიდან ირკვევა, რომ წელს თბილისის ქუჩაზე ორმოების კეთილმოწყობის სამუშაოები ჩატარდება, ხოლო ქუჩის სრულ რეკონსტრუქციას წყლის ხაზების გამოცვლამდე უნდა ველოდოთ.
ფენია თოროსიან
