ახალქალაქის სპორტკომპლექსის ახალგაზრდა მოკრივეები 21-დან 26 თებერვლის ჩათვლით ბათუმში, ბიჭებსა და გოგონებს შორის საქართველოს ჩემპიონატში მონაწილეობენ. გუშინ სპორტსმენების პირველი ბრძოლა გაიმართა.
გუშინ, 21 თებერვალს, სპორტკომპლექსის მოსწავლეები, 12 ახალგაზრდა მოკრივე ბათუმში ბიჭებსა და გოგონებს შორის კრივში საქართველოს ჩემპიონატში მონაწილეობის მისაღებად გაემგზავრა. ახალქალაქიდან ჩემპიონატზე 11 ბიჭი და ერთი გოგონა- ანა კრიკიანი გავიდა. ყველა მათგანი ახალქალაქის სპორტკომპლექსის მოსწავლეა. ბათუმში ჩემპიონატზე სასკოლო კატეგორიიდან ახალგაზრდებში გადასული ევროპის მოქმედი ჩემპიონი გორ ღაზარიანიც წავიდა.
საქართველოს ჩემპიონატი ბათუმში გუშინ, 21 თებერვალს დაიწყო და 26 თებერვლამდე გაგრძელდება.
სპორტკომპლექსის დირექტორისა და ტრენერის ატომ ელიზბარიანის თქმით, პირველი ბრძოლა გუშინ გაიმართა. ახალქალაქელ მოკრივეებს შორის არის გამარჯვებულებიც და დამარცხებულებიც.
„გამარჯვებული ფინალში გამოვლინდება, გუშინ ხუთმა სპორტსმენმა მოიგო, დღეს არიან გამარჯვებულებიც, არიან ასევე დამარცხებულებიც. ჯერ ნახევარფინალში უნდა გავიდნენ, მერე ფინალში“, – თქვა ატომ ელიზბარიანმა.
