წელს ახალქალაქის მუნიციპალიტეტის სოფელ სულდაში სკოლის ახალი შენობის მშენებლობა დაიწყება, რომელიც 2026 წლის ბოლომდე დასრულდება. საშუალო სკოლის ახალი შენობა თანამედროვე სტანდარტებს დააკმაყოფილებს და 180 მოსწავლეზე იქნება გათვლილი.
სულდას საჯარო სკოლაში ამჟამად 122 მოსწავლე სწავლობს. სოფელ სულდას სკოლაში ორი კორპუსია: ერთი სოფლის ყოფილი საკრებულოს შენობაა, მეორე სოფლის ხორცის გადამამუშავებელი ქარხნის შენობაა, რომელიც 1980 წელს აშენდა. სკოლას არც სპორტული დარბაზი აქვს და არც ლაბორატორია. ბოლო 20-25 წლის განმავლობაში განხორციელებულმა მცირე რემონტებმა სკოლაში მნიშვნელოვანი პოზიტიური ცვლილებები არ შეიტანა.
სკოლის დირექციამ ახალი შენობის აშენების აუცილებლობის შესახებ განგაში მრავალი წლის წინ ატეხა. ახალი შენობის მშენებლობა დაპირებული იყო ჯერ კიდევ 2022 წელს, მთავრობის მიერ სკოლების გარემონტებისა და მშენებლობის მასშტაბური პროექტის ფარგლებში, რომელიც სამ წელიწადში უნდა დასრულებულიყო.
უფრო დაწვრილებით შეგიძლიათ წაიკითხოთ ქვემოთ:
სოფელ სულდაში სკოლის ახალი შენობის მშენებლობაზე სატენდერო კონკურსი უკვე გაიმართა. სამუშაოს საერთო ხანგრძლივობა უნდა იყოს 25 თვე. საპროექტო დოკუმენტაციის მოსამზადებლად გამოყოფილია 6 თვე. ყველა საჭირო ნებართვის მისაღებად 1 თვეა საჭირო. სამშენებლო სამუშაოები 18 თვე გაგრძელდება.
როგორც მშენებლობის მწარმოებელი კომპანიისგან შევიტყვეთ, შენობა ექსპლუატაციაში 2026 წლის ბოლომდე შევა.
„მშენებლობის დასაწყებად ნებართვას ველოდებით. ამინდის პირობების გამო სამშენებლო სამუშაოები ამჟამად შეუძლებელია. მშენებლობას მარტში დავიწყებთ“, – Jnews-თან სატელეფონო საუბარში თქვა შპს „MC Group“-ის წარმომადგენელმა.
ტენდერში 4 931 692.00 ლარის ოდენობით გამარჯვებული კომპანია შპს „MC Group“ გახდა. ტენდერში ასევე მონაწილეობდა კიდევ ორი კომპანია: შპს „Saba Construction“ და შპს „Alliance biulders“.
სკოლის ახალი შენობა ორსართულიანი იქნება, საერთო ფართი 2250 მ².
გევორგ ჯანოიან
