ახალქალაქის მუსიკალური სკოლის ძველ შენობას კაპიტალური რემონტი ესაჭიროება, რომელიც წლების განმავლობაში სხვადასხვა მიზეზით ჭიანურდებოდა. ამ სკოლის მოსწავლეების წარმატებები დიდი მოტივაციაა მომავალი თაობისთვის, მაგრამ შენობის მდგომარეობა საპირისპიროს ადასტურებს.
მუსიკალური სკოლა ახალქალაქის ცენტრში, ქალაქის ერთ-ერთ უძველეს შენობაში მდებარეობს, რომელიც ოჰანჯანიანთა ოჯახის სახლი იყო, ამ ოჯახის შთამომავლები ამჟამად კანადაში ცხოვრობენ. თავდაპირველად შენობაში განთავსებული იყო საფოსტო სამსახური, მოგვიანებით კი აქ დაარსდა მუსიკალური სკოლა.
მრავალი წლის განმავლობაში Jnews-ი არაერთხელ აქვეყნებდა ინფორმაციას ქალაქ ახალქალაქში არსებული მუსიკალური სკოლის მდგომარეობის შესახებ, სადაც 161 მოსწავლე სწავლობს. ამ პრობლემის მოგვარების აუცილებლობაზე საუბრობს ადგილობრივი ხელისუფლებაც, თუმცა სიტუაცია არ შეცვლილა.
ჯერ კიდევ 2023 წელს ახალქალაქის მერმა მელქონ მაკარიანმა თქვა, რომ პროექტი უკვე მზად იყო, მოვიდნენ პროექტის შემდგენები, ყველა საკითხი განიხილეს სკოლის ხელმძღვანელობასთან. გადაწყდა, რომ შენობის ფასადი უცვლელი დარჩენილიყო, ხოლო უკანა ნაწილი, სადაც დაზიანებულია, გარემონტდეს. სამუშაოების დასრულება 2023 წელს იგეგმებოდა, თუმცა განხილვის შემდეგ გადაწყდა, რომ განხორციელებულიყო მთლიანი რემონტი და არა ნაწილობრივი. თუმცა ეს საკითხი 2024 წელს არ მოგვარებულა.
2025 წლის მუნიციპალურ ბიუჯეტში მუსიკალურ სკოლასთან დაკავშირებით გათვალისწინებულია ზოგადი ბიუჯეტი, რომელიც შარშან 217 860 ლარს შეადგენდა, ხოლო წელს თანამშრომელთა ხელფასების გაზრდის გამო ბიუჯეტი 10%-ით გაიზარდა და შეადგინა 233 000 ლარი. საკუთარი სკოლის შემოსავალი 19 560 ლარია, დანარჩენი კი მუნიციპალიტეტის ბიუჯეტიდანა.
მუსიკალური სკოლის დირექტორი სვეტლანა კაროიანი იმედოვნებს, რომ სკოლა წელს გარემონტდება.
„მითხრეს, ვინც უნდა დააპროექტოს, უნდა ნახოს, გადაწყვიტოს, რა უნდა გააკეთონ, მთლიანად თუ ნაწილობრივ, ჯერ არ გადაუწყვეტიათ. მაგრამ მინდა, რომ კაპიტალურად გააკეთონ. გაგვეხარდა, ველოდებით. წინა ჯერზე პროექტი არასწორად იყო შედგენილი, ამიტომ არ მიიღეს. ამიტომ ეს ყველაფერი ჰაერში დარჩა. კიდევ ერთხელ უნდა ჩამოვიდნენ და დაგეგმონ“, – ამბობს სვეტლანა კაროიანი.
მერიაში ირწმუნებიან, რომ მუსიკალურ სკოლასთან დაკავშირებით არის გეგმები, მაგრამ რეალურად ჯერ არც ფული და არც პროექტი არ არის.
„ჯერ არ არის პროექტი და არც არაფერია დაგეგმილი, მაგრამ გვაქვს განზრახვები, რომ გავაკეთოთ. წინა ჯერზე არ დაგვისრულებია, რადგან არ გამოვიდა. მუსიკალურ სკოლაში ვიყავით, შევისწავლეთ, და მივხვდით, რომ იმ პროექტით არ შეიძლებოდა. რეაბილიტაცია სავარაუდოდ არ იქნება, ალბათ ხელახლა ავაშენებთ. ისე გავაკეთებთ, რომ ისტორიულ შენობას არ ვახლოთ ხელი, ხოლო დამატებული დავანგრიოთ. ვნახოთ, როცა გვექნება დამატებითი ფინანსები, მაშინ გავაკეთებთ. ჩვენც ვნახოთ, რა თანხის დაზოგვა შეგვიძლია ტენდერებიდან და ვეცდებით ამ მიზნით გამოვიყენოთ“.- თქვა მერიის ეკონომიკური განვითარებისა და ქონების სამსახურის უფროსმა მნაცაკან ფამბუხჩიანმა.
სკოლის აღდგენის შესახებ საბოლოო გადაწყვეტილება გაურკვეველ მდგომარეობაშია და მხოლოდ დამატებითი თანხების ხელმისაწვდომობისა და მნიშვნელოვანი დანაზოგების მქონე ტენდერების შემთხვევაში შეიძლება მოსალოდნელი იყოს სამუშაოების დაწყება. მნიშვნელოვანია, რომ მომავალში ეს საკითხი არ დარჩეს დაპირებების დონეზე, არამედ რეალური მხარდაჭერა იყოს ქალაქის ისტორიული მემკვიდრეობის შესანარჩუნებლად და ადგილობრივი ბავშვებისთვის სასწავლო პირობების გასაუმჯობესებლად.
წაიკითხეთ ასევე:
