ახალქალაქის მუნიციპალიტეტის ფერმერები ამ დროისთვის კარტოფილის რეალიზაციის პროცესით კმაყოფილნი არიან, თუმცა დაბალი ფასი მათ არ აწყობთ. მათი თქმით, წელს კარტოფილის დაბალი ფასი უხვი მოსავალით კომპენსირდება. მუნიციპალიტეტში 1 კგ კარტოფილზე ფასი 40-დან 65 თეთრამდე მერყეობს.
ახალქალაქის მუნიციპალიტეტში კარტოფილის მოსავლის აღებასთან დაკავშირებული სირთულეები დასრულდა, მუნიციპალიტეტის ძირითადი ბოსტნეულის დახარისხება-შენახვის სირთულეც დაძლეულია. ახლა რეალიზაციის პროცესი მიმდინარეობს. წელს რეალიზაციასთან დაკავშირებით პრობლემები ჯერ არ არის. ახალქალაქის კარტოფილის ძირითადი მყიდველები არიან გადამყიდველები აზერბაიჯანიდან და რუსეთიდან, მაგრამ არიან სხვებიც. მუნიციპალიტეტიდან დიდ სატვირთო მანქანებს ყოველდღიურად ათასობით ტონა კარტოფილი გადააქვთ აზერბაიჯანში, რუსეთში, უკრაინაში…
2024 სასოფლო-სამეურნეო წელს ახალქალაქის მუნიციპალიტეტში კარტოფილის უპრეცედენტო მოსავალი იყო. მუნიციპალიტეტის მოსავლიანობის შესახებ ოფიციალური მონაცემები ჯერ არ არის შეგროვებული, თუმცა ფერმერები ამბობენ, რომ 2024 წელს კარტოფილის მოსავლიანობა 2023 წელთან შედარებით ორჯერ მაინც მაღალია.
მუნიციპალიტეტში მოყვანილი კარტოფილისა და სხვა პროდუქტების მოსავლიანობის ოფიციალურ სტატისტიკას აგროვებს სოფლის მეურნეობის სამინისტროს ახალქალაქის საინფორმაციო და საკონსულტაციო ცენტრი, რომელსაც მონაცემები ჯერ არ დაუჯამებია.
ფერმერების თქმით, მუნიციპალიტეტიდან კარტოფილის რეალიზაციის პროცესი უკვე სამი თვეა სტაბილურად მიმდინარეობს, თუმცა ფერმერებს საწყობებში ბევრი კარტოფილი აქვთ დარჩენილი.
სოფელ აზავრეთიდან ზაქარიან ბაგრატი ამბობს, რომ სოფლიდან ყოველდღიურად 6-7 სატვირთო მანქანით კარტოფილი გადის.
„ჩვენს სოფელში თითქმის მთლიანად კარტოფილი გაყიდულია, ფასი 50-55 თეთრია. ფასი არ არის დამაკმაყოფილებელი, მაგრამ რეალიზაციასთან დაკავშირებით არანაირი პრობლემა არ არის. 50 თეთრი ფარავს დანახარჯს, რადგან სარწყავი ფული არ გადაგვიხდია, ვიტამინებში არ გადაგვიხდია, ხოლო მოსავალი ორმაგი გამოდგა. თუკი გასულ წელს 1 ჰექტარზე 20 ტონა კარტოფილი გვქონდა, წელს მოსავლიანობა 40 ტონა იყო. წელს სამუშაო ძალას ძვირი გადავუხადეთ, მაგრამ მთავარია სოფელში არის საჭიროება და ბაზარი. სოფელში მოსავლის 70% უკვე გაყიდულია. სოფლიდან დღეში 100 ტონა კარტოფილი გადის“, – ამბობს ზაქარიან ბაგრატი.
სოფელ დილისკაში მცხოვრები არშაკ გოგორიანიც აცხადებს, რომ რეალიზაციის პრობლემა არ არის, მაგრამ ფასი დაბალია. მისი თქმით, სოფელში ფერმერებმა იმდენი გაყიდეს, რომ სამუშაო ძალის დავალიანება დაფარონ, და ფასების მატებას ელოდებიან.
„ფასი დაბალია, გავყიდე, მუშების ვალები მქონდა, ახლა ველოდები, იმედია ცოტათი მაინც გაძვირდება. სიმართლე გითხრათ, არც კი ვიცი სწორად ვაკეთებ თუ არა, გასული გამოცდილებიდან გამომდინარე. ჩვენს სოფელში სხვა ფერმერებიც ასე აკეთებენ, იმდენი გაყიდეს, რომ ვალები დაეფარათ, დანარჩენი კი იმ იმედით დატოვეს, რომ გაზაფხულზე გაძვირდება“, – ამბობს არშაკ გოგორიანი.
ფერმერის თქმით, სოფელ დილისკაში ჯერ კიდევ ძალიან ბევრი კარტოფილია.
კარტოფილის მყიდველები მუნიციპალიტეტის ცენტრიდან მოშორებულ სოფლებში არ დადიან, ამ სოფლების ფერმერებს თავად მიაქვთ დიდ ქალაქებში ან მყიდველებს პოულობენ სხვა სოფლებში და თავად გადააქვთ.
კარტოფილის გადამყიდველების დიდი სატვირთო მანქანები ჩერდებიან ცენტრალურ გზასთან მდებარე სოფლებში: ბარალეთში, კორხში და სხვა, გამყიდველებმა უკვე იციან, მიდიან და მოლაპარაკებას აწარმოებენ. ხოლო ზოგიერთ სოფელში ადგილობრივმა გადამყიდველებმა გაუკეთეს ორგანიზება კარტოფილის რეალიზაციას.
სოფელ დიდი სამსარიდან ნასლეტ ჰოვანისიანი ამბობს, რომ დიდი სამსარიდან და პატარა სამსარიდან კარტოფილის გადაყიდვისთვის პატარა სამსარის მცხოვრები ყიდულობს. „არის ერთი ადამიანი, რომელიც 45-50 თეთრად ყიდულობს. ხალხი მოსავლის ნაწილს ყიდის, დანარჩენს ჯერ-ჯერობით ტოვებს“, – ამბობს ის.
როგორც სხვადასხვა სოფლის ფერმერებთან ჩვენი საუბრიდან ჩანს, რეალიზაციის პრობლემა არ არის, თუმცა ზოგიერთ სოფელში კარტოფილს გაძვირების იმედით აღარ ყიდიან, როგორ იმოქმედებს ეს მოთხოვნაზე, შენარჩუნდება თუ არა მაღალი ფასი გაზაფხულზე, ამ კითხვებს ზუსტი პასუხი არ აქვს.
