ახალქალაქის მერიამ სატელევიზიო და რადიომაუწყებლობის საინფორმაციო მომსახურებაზე 44 987 ლარის ოდენობით ტენდერი გამოაცხადა.
ტენდერი მიმდინარე წლის 8 იანვარს გამოცხადდა და 16 იანვარს დასრულდება. ტენდერი უნდა აკმაყოფილებდეს გარკვეულ პარამეტრებს და უზრუნველყოს შემდეგი მომსახურება:
საქართველოს საზოგადოებრივი მაუწყებლის სიგნალის მიღება და გადაცემა ახალქალაქის მუნიციპალიტეტის ტერიტორიაზე – 34000 წუთი;
უნდა იმუშაოს არანაკლებ ორმა გადამღებმა ჯგუფმა – 3880 წუთი;
ტელევიზიის Facebook გვერდზე საზოგადოებისთვის მნიშვნელოვანი ინფორმაციის შემცველი ვიდეოების და განცხადებების, ასევე სატელევიზიო რეპორტაჟების მომზადება და განთავსება – 100 ც.;
Facebook-ზე პირდაპირი ტრანსლაციის უზრუნველყოფა; youtube, პირდაპირი ტრანსლაცია შემთხვევის ადგილიდან (მყიდველის მოთხოვნით) 380 წუთი;
კვირაში ერთხელ უნდა მომზადდეს და გაშუქდეს 10-15 წუთიანი გადაცემები კულტურულ, სპორტულ, სოციალურ და სხვა თემებზე და გადაცემაში მონაწილეობა მიიღოს მოწვეულმა სტუმარმა. ტელევიზიით გადაცემული პროგრამები ასევე უნდა განთავსდეს ინტერნეტში: Facebook; Youtube – 203 წუთი.
ტენდერის მონაწილე უნდა აკმაყოფილებდეს შემდეგ ტექნიკურ პირობებს:
მიმწოდებელს უნდა ჰქონდეს მაუწყებლობის ნებართვა სამცხე-ჯავახეთის რეგიონში (ქალაქ ახალქალაქის ტერიტორიულ საზღვრებში), მაუწყებლობის ნებართვა მეტრულ ან დეციმეტრულ სიხშირეზე (მონაწილემ უნდა წარმოადგინოს აღნიშნულის დამადასტურებელი დოკუმენტაცია) ან/და ლიცენზია;
ტელეკომპანიას უნდა ჰქონდეს საკუთარი არხი www.youtube.com-ზე, Facebook-ზე, სადაც უნდა აიტვირთოს ხელშეკრულებით მომზადებული ყველა პროდუქტი;
დამკვეთის მიერ მოწოდებული ან კონტრაქტორის მიერ მომზადებული მასალები უნდა განათავსოს ტელეკომპანიის ეთერში ნახვების საუკეთესო დროს. (პრაიმ-ტაიმის დროს).
აღსანიშნავია, რომ მთლიანობაში წლევანდელ ბიუჯეტში „საინფორმაციო პროგრამებზე“ 62 750 ლარია გამოყოფილი. გასულ წელს მუნიციპალიტეტის ბიუჯეტში იგივე თანხა იყო შეტანილი. ეს თანხა წლების განმავლობაში ნაწილდებოდა ადგილობრივი ხელისუფლების შემდეგ ბენეფიციარებზე:
ადგილობრივი ტელევიზია АТV-1 45 000 ლარი,
GUARDIAN.GE -9850 ლარი,
expressnews-3000 ლარი,
გაზეთი “ვრასტანი”- 4900 ლარი.
ახალქალაქის მუნიციპალიტეტის ბიუჯეტის მიხედვით, ბოლო 4 წლის განმავლობაში, „საინფორმაციო პროგრამაზე“ ხარჯები გაიზარდა, თუმცა წელს თანხა იგივეა, რაც შარშან. 2022 წელს ინფორმაციის გავრცელებისთვის 47 900 ლარი გამოიყო, 2023 წელს სულ 57 900 ლარი. 2024 წელს ამ პუნქტზე თანხა კვლავ გაიზარდა და 62 750 ლარი შეადგინა, იგივე თანხა გამოიყო წელს – 2025 წელს.
დამატებითი ინფორმაციისთვის, თუ ვისთვის და რისთვის გამოიყოფა ეს თანხები, წაიკითხეთ ჩვენს მასალაში:
მედია, რომელიც ახალქალაქის ბიუჯეტიდან ფინანსდება
