ახალქალაქში წინასაარჩევნო პლაკატების მოხსნას ყოველთვის ართულებს ის, რომ პარტიებმა ან არ იციან, რომ უნდა მოხსნან, ან იმედოვნებენ, რომ ამას სხვა გააკეთებს. კანონის მიხედვით, საარჩევნო პლაკატები უნდა მოეხსნათ არჩევნებიდან არაუგვიანეს 41-ე დღისა, ანუ 6 დეკემბრის ჩათვლით, თუმცა, როგორც ახალქალაქში, ისე სოფლებში, რეგიონში ყველაზე აქტიური პარტიების პლაკატები – 41, 5, 4 – ისევ კიდია.

საქართველოს პარლამენტის 2024 წლის 26 ოქტომბრის არჩევნებისთვის წინასაარჩევნო ღონისძიებების განრიგის მიხედვით, შესაბამისი საარჩევნო სუბიექტი ვალდებულია სააგიტაციო მასალების არჩევნებიდან 41 დღის ვადაში მოხსნა უზრუნველყოს. წინააღმდეგ შემთხვევაში, ისინი საქართველოს კანონმდებლობის თანახმად პასუხისმგებლობის წინაშე დადგებიან. თუმცა, ახალქალაქში, 17 დეკემბრის მდგომარეობით, პროპაგანდისტული მასალები კვლავ ყველგან კიდია. მანამდე, 2018 და 2020 წლების ბოლო არჩევნებზე, პლაკატები საბოლოოდ ახალქალაქის სერვის ცენტრმა ჩამოხსნა, მას შემდეგ რაც დიდხანს ეკიდა.

აღვნიშნქვთ, რომ Jnews-მა აქამდეც დაწერა, რომ პლაკატების მოხსნის ვადა ახლოვდება. თუმცა, არცერთმა მხარემ არ მიიღო რაიმე ქმედება.

ჩვენ ახალქალაქში პარტიის წარმომადგენლებს დავურეკეთ, რათა გაგვერკვია, როდის აპირებდნენ სააგიტაციო მასალების ჩამოხსნას.

“კოალიცია ცვლილებისთვის” წარმომადგენელმა (№4) მელიქ რაისიანმა Jnews-თან ინტერვიუში აღნიშნა, რომ მიაჩნია, რომ ეს ახალქალაქის სერვისცენტრმა უნდა გააკეთოს.

„ქართული ოცნების“ პლაკატები ყველგან ჰკიდია, მათ უთხარით. თან ჩვენ არ ვაღიარებთ არჩევნებს“, – კომენტარი გააკეთა მან.

კოალიცია „ერთობა – ნაციონალური მოძრაობის“ წარმომადგენელმა არსენ კარაპეტიანმა (№5) ასე გვიპასუხა: „როგორც კი „ოცნება“ დაიწყებს, ჩვენც მათთან ერთად დავიწყებთ“, – კომენტარი გააკეთა მან.

ახალქალაქში „ქართული ოცნების“ შტაბის ხელმძღვანელმა მელქონ მაკარიანმა აღნიშნა, რომ ამ საკითხით უახლოეს დღეებში დაკავდებიან.

„ჩვენ ყველამ კანონი ვიცით, ძალიან ბევრი საქმე გვქონდა, უახლოეს დღეებში მოვიხსნით“, – თქვა მან.