ჯავახეთში შშმ ბავშვთა ერთადერთი ინტეგრაციის ცენტრი არის Rhea Union-ის ფილიალი, რომელიც ფუნქციონირებს საქართველოში სომხური სამოციქულო ეკლესიის სამცხე-ჯავახეთის ეპარქიის ვიკარიატის ხელმძღვანელობით, საფრანგეთის განვითარების სააგენტოს (AFD) ფინანსური მხარდაჭერით კი მუშაობს. ეს ცენტრი ასევე უნდა დარეგისტრირდეს „გარე ძალების ინტერესების ხელშემწყობი ორგანიზაციების“ რეესტრში „გარე გავლენის გამჭვირვალობის შესახებ“ კანონის საფუძველზე, ანუ სახელმწიფოს მიერ განისაზღვრება ე.წ. “უცხოურ აგენტად”.
ახალქალაქის საინტეგრაციო ცენტრი 2010 წელს გაიხსნა და დღემდე ფუნქციონირებს, მაგრამ ამ ხნის განმავლობაში იყო წლები, როცა ცენტრი არ ფუნქციონირებდა გრანტების უქონლობის გამო. იმ წლებში ახალქალაქში განსაკუთრებული საჭიროების მქონე ბავშვებს ინტეგრაციისა და სოციალიზაციის ერთადერთი შესაძლებლობა ჩამოერთვათ.
ახალქალაქის საინტეგრაციო ცენტრს დღეს 12 ბავშვი სტუმრობს. ეს ცენტრი მოქმედებს იმისათვის, რომ შეზღუდული შესაძლებლობის მქონე ბავშვებს შესაძლებლობა ჰქონდეთ დაკავდნენ არტ-თერაპიით, ძირითადად – ეს არის ჭურჭელი, კერამიკა, თექაზე მუშაობა და ფერადი ქაღალდები. მასწავლებლები რუზანა ერემიანი და ერანუი მაკარიანი თამაშობენ ბავშვებთან ჯანსაღი ცხოვრების წესის შესანარჩუნებლად. აქ ბავშვები ასევე სწავლობენ ლექსებს, მონაწილეობენ ღონისძიებებში და ატარებენ საინტეგრაციო გაკვეთილებს, რაც იმას ნიშნავს, რომ სხვადასხვა სკოლების ბავშვები სამოქალაქო განათლების გაკვეთილების ფარგლებში დაუკავშირდებიან ცენტრის მოსწავლეებს.
იმ შემთხვევაში, თუკი გრანტები არ იქნება, ეს ბავშვები ისევ დაკარგავენ ამ ყველაფერს.
„ახალი კანონი, რა თქმა უნდა, ჩვენზეც ვრცელდება, რადგან გვაქვს უცხოური გრანტები, რომლითაც ვაკეთებთ ამ მშვენიერ საქმეებს. დიდი პრობლემა იქნება, თუ დაფინანსებას შეწყვიტავენ. თუ ეს გრანტები ხელს შეუწყობს სერვისის სრულყოფას ბავშვებისთვის და ჩვენთვის ძალიან მნიშვნელოვანია. თუ კანონი დამავალდებულებს, მე ამ ქვეყანაში ვცხოვრობ, მაგრამ მე არ შემიძლია გავაპროტესტო ეს კანონი, მინდა თუ არა, იძულებული ვარ დავრეგისტრირდე“, – ამბობს Rhea Union-ის მმართველობის თავმჯდომარე ელისო რეხვიაშვილი.
მან ასევე დაამატა, რომ მუნიციპალიტეტის დაფინანსების იმედი აქვს, რადგან გრანტების არარსებობის შემთხვევაში ცენტრი უბრალოდ ვერ იმოქმედებს.
საინტეგრაციო ცენტრის ბავშვებმა ქაღალდის ბუკეტები მოამზადეს
ელისო რეხვიაშვილის თქმით, მას ცენტრში თვეში 2-3-ჯერ საუკეთესო სპეციალისტები მოჰყავს, რათა ბავშვებს პროფესიები ასწავლონ. ცენტრის მთავარი მიზანია სპეციალური საჭიროების მქონე ბავშვების პროფესიული უნარების განვითარება.
„არის სხვადასხვა სახელოსნო, სადაც სწავლობენ კერამიკაზე და ქაღალდზე მუშაობას. ეს რეაბილიტაცია კი არ არის, ეს არის უმაღლესი დონე, ეს არის შრომის და პროფესიული უნარების განვითარება. ბავშვები მოდიან, ვითარდებიან, სოციალიზდებიან. ჩვენ ამ ცენტრში არა მარტო რეგულარულ მეცადინეობებს ვუზრუნველყოფთ, არამედ, მაგალითად, მიგვყავს ინკლუზიურ ბანაკებში, რომლებსაც ვაწყობთ ასპინძაში. ვასწავლით დამოუკიდებელ ცხოვრებას, რომ დასაქმდნენ“, – ამბობს ელისო რეხვიაშვილი.
ახალქალაქის საინტეგრაციო ცენტრი ბავშვებს კვირაში ორჯერ, 3 საათით ღებულობს.
Rhea Union-ი სომხურ სამოციქულო ეკლესიასთან თანამშრომლობს, დაწესებულებას მეცადინეობებისთვის სომხური სამოციქულო ეკლესიის სამცხე-ჯავახეთის ეპარქიის ვიკარიატი უზრუნველყოფს, რომელიც ცენტრის კომუნალურ დანახარჯებსაც ფარავს.
