სიახლე განათლება

„უმაღლესი განათლების შესახებ“ კანონში ცვლილებებია მოსალოდნელი

---

„უმაღლესი განათლების შესახებ“ საქართველოს კანონში შესატანი ცვლილებების ჩამონათვალი ცნობილია, რაზეც პარლამენტი საგაზაფხულო სესიაზე იმუშავებს. არაერთი ცვლილება იქნება, როგორც განათლების სფეროში, ასევე უნივერსიტეტების ავტორიზაციასთან დაკავშირებულ საკითხებში.

მათ შორის არის ასევე ერთწლიანი (60 კრედიტი) სამაგისტრო საგანმანათლებლო პროგრამის შემუშავება, რომლის არჩევის შემთხვევაში პირს არ დასჭირდება ზოგადი სამაგისტრო გამოცდის ჩაბარება, მაგრამ ამ შემთხვევაში მისი დასრულება არ გახდება დოქტორანტურის გაგრძელების საფუძველი.

განათლების, მეცნიერებისა და ახალგაზრდობის საქმეთა კომიტეტის 2024 წლის სამოქმედო პროგრამის თანახმად, უმაღლესი განათლების მიმართულებით საკანონმდებლო ცვლილებების შემდეგ:

• დადგინდება პროფესიული პროგრამების დისტანციურად განხორციელების შესაძლებლობა;
• კორექტირებული იქნება და ხელახლა ჩამოყალიბდება ელექტრონული სწავლების კონცეფცია;
• ნაწილობრივი ელექტრონული სწავლება დაიშვება ბაკალავრიატის, მაგისტრატურის და დოქტორანტურის ხარისხზე;
• მაგისტრატურაში პროგრამის ხელახალი აკრედიტაციის შემთხვევაში სწავლა მთლიანად ელექტრონულად იქნება შესაძლებელი.
• განათლების, მეცნიერებისა და ახალგაზრდობის მინისტრი განსაზღვრავს სწავლის იმ მიმართულებების ჩამონათვალს, სადაც შესაძლებელი იქნება ელექტრონული სწავლების კომპონენტის ნაწილობრივ ან სრულად გამოყენება,
• მაგისტრის ხარისხის დაუფლება არანაკლებ 60 კრედიტით (რეგლამენტირებული საგანმანათლებლო პროგრამების გამონაკლისით), რომელთა დასრულება არ იქნება დოქტორანტურაში სწავლის გაგრძელებისთვის საფუძველი.
• მაგისტრატურაზე მიღება არანაკლებ 60 კრედიტით არ მოხდება ზოგადი სამაგისტრო გამოცდების შედეგების საფუძველზე,
• სტუდენტების მაქსიმალური რაოდენობის გადაწყვეტისას/სტუდენტთა მაქსიმალური რაოდენობის გაზრდისას/უფლებამოსილი საბჭო უმაღლესი განათლების სამედიცინო აკადემიური პროგრამის განხორციელების შემთხვევაში განსაზღვრავს სტუდენტური ადგილების მაქსიმალურ რაოდენობას მითითებულ პროგრამაში,
• უმაღლეს საგანმანათლებლო დაწესებულებებს მიეცემა საშუალება, დაადგინონ სადისერტაციო საბჭოების ფორმირების წესი,
• უფლებამოსილ კომისიას ექნება უფლება შეზღუდოს სტუდენტების მიღების უფლება არა მხოლოდ უნივერსიტეტების, არამედ უმაღლესი განათლების საფეხურების მიხედვითაც.
• ურეგულირებული იქნება დეკანის დროებითი მოვალეობის შემსრულებლის არაუმეტეს 6 თვის ვადით დანიშვნის საკითხი.

ზემოაღნიშნულ ცვლილებებს საქართველოს მთავრობა წარუდგენს პარლამენტს და საკომიტეტო და სესიის განხილვის შემდეგ დამტკიცდება.