სამცხე-ჯავახეთის სახელმწიფო უნივერსიტეტში აბიტურიენტთა რაოდენობა ყოველწლიურად იზრდება. რასთან არის დაკავშირებული ეს ფაქტი, JNEWS-ი შეეცადა გაერკვია როგორც უნივერსიტეტიდან, ასევე წლევანდელი აბიტურიენტებისგან.
სამცხე-ჯავახეთის უნივერსიტეტის რექტორი მაკა ბერიძე ადასტურებს, რომ წელს მსურველთა რაოდენობა რამდენიმე ფაქტორის გამო გაიზარდა.
„სიმართლე გითხრათ, არასდროს ვიცოდი, რა სტატისტიკა ჰქონდათ სხვა უნივერსიტეტებს, რადგან ჩემთვის ეს არ არის მნიშვნელოვანი, ჩემთვის პრიორიტეტულია ჩვენი განვითარება. ჩვენს უნივერსიტეტში ყოველწლიურად იზრდება ქართული ენის მოსამზადებელ კურსზე სტუდენტების რაოდენობა. ხოლო წელს კიდევ უფრო მეტი აბიტურიენტი დარეგისტრირდა, რაც კონკურენციას ქმნის. ძალიან მიხარია, რომ საუკეთესო აბიტურიენტები ირჩევენ ჩვენს უნივერსიტეტს. მაგალითად, გასული წლის მონაცემებით, ჩვენს უნივერსიტეტში 9 მედალოსანმა ჩააბარა, რაც ძალიან მნიშვნელოვანია. ჩვენი მთავარი მოტივაციაა, რომ ჩვენი უნივერსიტეტი იყოს ხელმისაწვდომი სომეხი მოსახლეობისთვის. უნივერსიტეტის ყველა პროფესიული პროგრამა ახალქალაქის ფილიალში გადმოვიტანეთ“, – ამბობს რექტორი.
ის აღნიშნავს, რომ პროფესიონალური პროექტისთვის განკუთვნილი შენობის რემონტი აგვისტოში დასრულდება. ხოლო უნივერსიტეტის ადმინისტრაცია აპირებს სკოლებში ვიზიტს და მოსწავლეებისთვის უნივერსიტეტის პროგრამებისა და ფაკულტეტების წარდგენას.
„პროფესიული განათლების შემთხვევაში, თუ ახალციხეში გვყავს 70% ქართველი და 30% სომეხი, მაშინ შესაძლებელია, რომ ახალქალაქში ჩვენი სტუდენტების ნახევარზე მეტი სომეხი იყოს“,- ამატებს მაკა ბერიძე.
ჩვენს კითხვაზე, გაიზარდა თუ არა აბიტურიენტთა რაოდენობა იმის გამო, რომ თბილისში საცხოვრებელი ბინის ქირა ძალიან მაღალია და ხალხს დედაქალაქში სწავლის საშუალება არ აქვს, ბერიძემ გვიპასუხა:
„ჩვენ შევისწავლეთ, რატომ მოდის სტუდენტი ჩვენს უნივერსიტეტში. ისინი ირჩევენ ჩვენს უნივერსიტეტს, რადგან ხარისხიანი განათლება მათ ოჯახთან ახლოს არის ხელმისაწვდომი, რაც ფინანსურად მოსახერხებელია. ამავდროულად, გვაქვს სტატისტიკა, რომ სომხურენოვან სტუდენტებს არა მხოლოდ აქვთ დრო, რომ ისწავლონ უნივერსიტეტში, არამედ აბსოლუტურად კონკურენტუნარიანები არიან, იღებენ როგორც სახელმწიფო, ასევე მუნიციპალურ სტიპენდიებს. სხვა სიტყვებით რომ ვთქვათ, ისინი აერთიანებენ ხარისხიან განათლებას ხელმისაწვდომობასთან“.
საყურადღებოა ისიც, რომ თუ ადრე უნივერსიტეტი სომეხ და ქართველ სტუდენტებს ასხვავებდა და სომეხ სტუდენტებთან დათმობებზე მიდიოდა, ახლა ასე აღარ არის.
„როდესაც სომეხ სტუდენტს ვკითხე, რატომ აირჩია სამცხე-ჯავახეთის სახელმწიფო უნივერსიტეტი, მან ერთი ფრაზით მიპასუხა: „ვიცოდი, რომ ამ უნივერსიტეტში არ განგვასხვავებდით, იმ მიზეზით, რომ სომეხი ვარ“. მინდა ვთქვა, რომ სტუდენტებს არ სურთ დათმობები და პრივილეგიები, მათ არ უნდათ იყვნენ განსხვავებულები. ჩვენთვის არ აქვს მნიშვნელობა, ადრე თუ იყო სხვაობა, ჩვენ დიდად ვაფასებდით, ბევრს ვუთმობდით, რადგან სომხები იყვნენ, ახლა ასე აღარ არის“, – ასკვნის უნივერსიტეტის რექტორი მაკა ბერიძე.
წელს სამცხე-ჯავახეთის უნივერსიტეტში ჩაბარება სურს სოფელ ხულგუმოდან ნარინე თოფალიანსაც. ამბობს, რომ დარეგისტრირებამდე დაინტერესდა სტუდენტებთან, გაიგო, რომ ეს კარგი უნივერსიტეტია.
„მინდოდა სამცხე-ჯავახეთის უნივერსიტეტში ჩაბარება, ჯერ იმიტომ, რომ მშობლებთან ახლოს ვიქნები და მეორეც იმიტომ, რომ ფინანსურად მოსახერხებელია. ქალაქიდან შორს არ ვარ, საცხოვრებელს არ ვიქირავებ, ამიტომ ბევრ ფულს არ დავხარჯავ. ბუნებრივია, თბილისში გაცილებით ძვირი იქნება ვიდრე აქ. რაც შეეხება უნივერსიტეტს, ბევრისგან დადებითი გამოხმაურება მოვისმინე“, – ამბობს ნარინე.
ოჯახთან დაახლოება სურს სოფელ ბავრას რიფსიმე კარსლიანსაც.
„მჯერა, რომ თბილისში ცხოვრება გაცილებით რთულია, ვიდრე აქ. ამასთან, გზასთან დაკავშირებული ხარჯები მცირეა, ბინის ქირაობას არ ვაპირებ“, – ამბობს ის.
