შრომის ინსპექციის სამსახურის ინფორმაციით, 2023 წლის 1 იანვრიდან ექიმებისა და ექთნების მინიმალური საათობრივი ანაზღაურება დაწესდა.
ექიმების მინიმალური ხელფასი საათში 7 ლარია (ანუ თვეში არანაკლებ 1260 ლარი), ექთნების კი საათში 4,4 ლარი (მინიმუმ 792 ლარი თვეში). ახალი წესების მიხედვით, ხელფასის ზრდა 9 000-მდე ექიმსა და 8 000-ზე მეტ ექთანს შეეხება.
ცვლილებები ახალქალაქის საავადმყოფოს პერსონალსაც შეეხო, თუმცა ზუსტი ინფორმაცია ჯერ არ გავრცელებულა. საავადმყოფო ამ საკითხით დაკავდა, რათა ყველა დეტალი დააზუსტონ.
საავადმყოფოს მენეჯერის ალექსან თოროიანის თქმით, საბოლოო ინფორმაციას Jnews-საც შეატყობინებენ.
რეფორმის შედეგად საყოველთაო ჯანდაცვის პროგრამაში შემავალ ყველა კლინიკას ექიმებისა და ექთნების ხელფასის განსაზღვრა ჯანდაცვის სამინისტროს მიერ წარმოდგენილი მინიმალური ზღვრის გათვალისწინებით მოეთხოვება.
შრომის ინსპექციის სამსახურს უფლება აქვს სრული შემოწმება ჩაატაროს სამედიცინო დაწესებულებებში, როგორც შრომითი უფლებების დაცვაზე, ასევე ექიმებისა და ექთნების მინიმალურ ანაზღაურებასთან დაკავშირებულ საკითხებზე.
შრომის ინსპექციის ფეისბუქის გვერდზე ვკითხულობთ:
„კანონმდებლობა მკაფიოდ განსაზღვრავს ექიმის და მედდის ფუნქციებსა და მოვალეობებს, შესაბამისად, თუ აუდიტის დროს დადგინდება, რომ მინიმალური ხელფასის გადახდის თავიდან აცილების მიზნით ექიმს ან ექთანს უფრო დაბალი წოდება ენიჭება ან სხვა პროფესიის ფუნქციები ეკისრება, აღნიშნული გარემოება სამსახურის შრომის ინსპექციის მხრიდან დარღვევად ჩაითვლება, შესაბამისად დაიწერება ჯარიმაც. გარდა ამისა, ჯანდაცვის დაწესებულებას ექიმის/ექთნის სრული ხელფასის გადახდაც დაეკისრება.
შრომის ინსპექციის სამსახურის მიერ დამსაქმებლის ნებისმიერ არაკეთილსინდისიერ ქმედებას ადეკვატური და მკაცრი რეაქცია მოჰყვება და ყველა დასაქმებულის უფლებებს დადგენილი კანონით დავიცავთ.“
