Jnews-ი ახალშექმნილი პოლიტიკური პარტია „კონსერვატიული მოძრაობის“ ახალქალაქის ოფისის ხელმძღვანელ არარატ ქამალიანს ესაუბრა. პარტიის დამფუძნებლები არიან ინტერნეტ პლატფორმის Alt-Info-ს წარმომადგენლები, რომლებიც საქართველოში ცნობილი არიან, როგორც ულტრაკონსერვატორული, ნაციონალისტური და პრორუსული ძალა. არარატ ქამალიანი არის ახალქალაქის გამგებლის ყოფილი უფლებამოსილი წარმომადგენელი, ასევე ნინო ბურჯანაძის პარტიის ყოფილი წევრი.
– თითქმის 10 წელია, რაც პოლიტიკაში არ ხართ, რამ განაპირობა თქვენი ინტერესი პოლიტიკის მიმართ და რატომ აირჩიეთ ეს კონკრეტული პარტია?
პოლიტიკაში 2014 წლამდე ვიყავი და ახლა ვფიქრობ, რომ ეს აუცილებელია. წავიკითხე პარტიის პროგრამა და ერთ-ერთი მთავარი პუნქტი, რაც ჩემს გულთან ახლოს იყო, ქრისტიანობის შენარჩუნებაა. საქართველოში უნდათ ქრისტიანობის გაძლიერება, სხვა რელიგიების წინააღმდეგი არ არიან, მაგრამ არ უნდათ, რომ საქართველოში ქრისტიანობა დასუსტდეს. ეს არის მთავარი მიზეზი, რის გამოც ავირჩიე ეს პარტია. ვგრძნობ, რომ პარტიის მიზანი ჩემს რწმენას შეესაბამება, თორემ იქ არ გავწევრიანდებოდი. მაგრამ მე ჯერ არ მაქვს პარტიული ბილეთი.
– იცნობთ კონსერვატორული მოძრაობის დამფუძნებლებს, ვინ არიან ისინი?
პარტია ახალია, შარშან ნოემბერში დარეგისტრირდა. პარტიის ლიდერი გოგა მახარაძეა. ზოგადად პარტია ახალგაზრდებმა შექმნეს, მათი ასაკი 30-40 წელია.
– თქვენ ახსენეთ ქრისტიანობის საფუძვლების გაძლიერება, აქვს თუ არა პარტიას სხვა მიზნები, რა იცით ამის შესახებ?
ზოგადად, ნებისმიერ პარტიას, რომელიც იქმნება, თავისი მიზანი აქვს. ეს არის მეზობლებთან ურთიერთობის გაუმჯობესება, ეს შეიძლება იყოს თურქეთი, სომხეთი, განსაკუთრებით რუსეთი. ვინაიდან რუსეთი ჩვენი უახლოესი მეზობელია, ქართული პროდუქციის უმეტესი ნაწილი რუსეთში იყიდება, კარგი იქნება, თუ ქართველი ფერმერი თავის პროდუქტს რუსეთში გაყიდიან. პარტიის მიზანია საკითხების გადაჭრა არა ოჯახური კავშირებით, არამედ იდეოლოგიური მოსაზრებებით.
– ჰყავს თუ არა პარტიას წევრები ახალქალაქში?
გახსნას 50-ზე მეტი ადამიანი ესწრებოდა, მაგრამ ჩვენ ვმუშაობთ ხალხთან, სურვილის შემთხვევაში შეუძლიათ ჩვენს ოფისში მოვიდნენ.
– თქვენ იყავით უფლებამოსილი გამგებელი, რას აკეთებდით თანამდებობიდან წასვლის შემდეგ, 2014 წლის შემდეგ?
არაფერი, შვილიშვილები გავზარდე, 4 შვილიშვილი მყავს.
