ახალქალაქში ამ დრომდე მხოლოდ რამდენიმე დასახელების პროდუქტი გაძვირდა, თუმცა არ არის გამორიცხული, რომ სხვა პროდუქტებიც არ გაძვირდება. მაღაზიის მფლობელები უკვე შეძენილ პროდუქტს არ აძვირებენ, მაგრამ ახალმა ფასებმა, რასაც ასახელებენ დისტრიბუტორები, ბევრს აიძულა უარი ეთქვა ახალ შესყიდვებზე.
დოლარი გაძვირდა, რუბლი დაეცა, უკრაინაში ომია, ყველა ეს ფაქტორი ძლიერ გავლენას ახდენს საქართველოში სურსათის ფასებზე. არა მხოლოდ საკვები, არამედ აუცილებელი საჭიროების პროდუქტები, როგორიცაა ფქვილი, შაქარი, მზესუმზირის ზეთი და ა.შ.
„გაძვირება მოსალოდნელი კი არ არის, უკვე გაძვირდა. გაძვირება იქნება ყველა მიმართულებით. იმიტომ, რომ იმპორტზე დამოკიდებული ქვეყანა ვართ – პირველი, და, იმიტომ, რომ ლარის კურსი ეცემა – მეორე, ეს დოლართან არის დაკავშირებული, ვალუტის კურსთან და ომთან. ომთან დაკავშირებულია, რადგან ორივე სახელმწიფო, რომლებიც საომარ ვითარებაში არიან ჩართულები, – ეს არის რუსეთი, ჩვენი ქვეყნის 20%-ის ოკუპანტი და უკრაინა, ჩვენი მეორე სავაჭრო პარტნიორი. უკრაინა, რომელიც ჩვენი მე-6 სავაჭრო პარტნიორი და მეგობარია, შესაბამისად, ეს შეუქცევად გავლენას მოახდენს ჩვენს საგარეო სავაჭრო ურთიერთობებზე – ეს პირველი და მეორე, ლარის კურსი დიდად არის დამოკიდებული იმ ტრანსფერებზე, რომლებიც ორივე ქვეყანაში ეკონომიკურ მიგრაციაში მყოფმა ჩვენმა მოქალაქეებმა გადმორიცხეს საქართველოში. და რა თქმა უნდა, ეს ნაკადი დაშრება, უახლოეს მომავალში მაინც. ეს დიდ გავლენას მოახდენს ლარზე, ამას უკვე ვხედავთ“, – ამბობს პოლიტოლოგი ვალერი ჩეჩელაშვილი.
ახალქალაქში ბოლო რამდენიმე დღის განმავლობაში შაქარზე მკვეთრად გაიზარდა ფასი – 50კგ-ზე 116 ლარიდან 175-180 ლარამდე, ანუ კილოგრამი შაქარი 1 ლარზე მეტით გაძვირდა. ფქვილის ფასი 50 კგ-ზე კვლავ 73 ლარია. ქათმის ბარკლებბი 4,80 ლარიდან 6 ლარამდე გაძვირდა. პროდუქციის უმეტესობა, რომელსაც გამყიდველები დოლარის კურსს უკავშირებენ, დაახლოებით ლარით გაძვირდა.
„არ გამოვრიცხავ, რომ საქართველოს საწყობებში დეფიციტი იყოს, რადგან მარცვლეული, რძის პროდუქტები, ბევრი პროდუქტი, როგორიცაა მზესუმზირის ზეთი, ძირითადად რუსეთიდან და უკრაინიდან შემოდის, ამიტომ ეს სავსებით მოსალოდნელია, ამაში გასაკვირი არაფერია. რა თქმა უნდა, არის ქვეყნები, რომლებსაც შეუძლიათ ამ დეფიციტის ჩანაცვლება, შესაძლებლობა ყოველთვის არის, რადგან ეს არის გლობალური ბაზარი, ჩვენ გვაქვს ღია ეკონომიკა და თავისუფალი ვაჭრობა დიდი ბაზრების აბსოლუტურ უმრავლესობასთან, მაგრამ ეს უბრალოდ უფრო ძვირი დაჯდება და შესაბამისად, სუპერმარკეტებში ფასებზეც იმოქმედებს. პირველ რიგში, იმპორტიზაცია იქნება თურქეთიდან და ევროპის ქვეყნებიდან. ადგილობრივი წარმოებაც შეიძლება, მაგრამ წინასწარ დაფიქრება იყო საჭირო, ხოლო ახლა ამას სერიოზული რესტრუქტურიზაცია, საწარმოო ციკლი დასჭირდება. ეს ის არ არის, რასაც დღეს თესავ, ხოლო ხვალ იღებ მოსავალს“, – ამბობს ვალერი ჩეჩელაშვილი.
