სოციალური ქსელებისა და ონლაინ მედიის ეპოქაში რეგიონული ტელევიზიებისთვის გადარჩენა სულ უფრო რთული ხდება. ბოლო წლებში საქართველოში ოთხი ტელეარხი დაიხურა, მათგან ორი — სამცხე-ჯავახეთში. ახალქალაქის ტელეკომპანია „ატვ-12“ (ATV-12) ჯერჯერობით აგრძელებს მუშაობას, თუმცა მისი არსებობა პირდაპირ არის დამოკიდებული მუნიციპალიტეტის ბიუჯეტიდან მიღებულ დაფინანსებაზე.
ბოლო წლებში ონლაინ მედიამ და სოციალურმა ქსელებმა მკვეთრად შეამცირეს ტელევიზიის პოპულარობა. საქართველოში დახურული ოთხი ტელეარხიდან ორი სამცხე-ჯავახეთის რეგიონში მოქმედებდა. ამაზე გავლენა მოახდინა კანონმდებლობამ და გრანტების შემცირებამ, რაც ადრე ტელეარხებს არსებობაში ეხმარებოდა. თუმცა, რეგიონული ტელეკომპანიები ფინანსურ პრობლემებს ადრეც აწყდებოდნენ და ზოგიერთი მათგანი იძულებულია ადგილობრივი ბიუჯეტის დაფინანსებით ისარგებლოს. ასე მოიქცა ახალქალაქის ტელეარხი „ატვ-12“-იც.
ახალქალაქის მუნიციპალიტეტის ბიუჯეტი 10 წელზე მეტია აფინანსებს ტელევიზიას, რომელიც ახალქალაქში მაუწყებლობს. დაფინანსების თანხა, მაგალითად, 2015 წელს 5 000 ლარს შეადგენდა, ხოლო 2025 წელს — 45 000 ლარს.
20 თებერვალს ახალქალაქის ტელეკომპანია „ატვ-12“-მა (ATV-12) გაიმარჯვა ტენდერში, რომელიც ახალქალაქის მერიამ განმეორებით 10 თებერვალს გამოაცხადა. ტენდერის პირობები ზღუდავდა მონაწილეთა რაოდენობას, ვინაიდან ტელეკომპანიას უნდა ჰქონდეს მაუწყებლობის ავტორიზაცია სამცხე-ჯავახეთში, კერძოდ კი ახალქალაქის მუნიციპალიტეტის ტერიტორიაზე; უნდა ფლობდეს მეტრულ ან დეციმეტრულ სიხშირეებზე გადაცემის ნებართვას (შესაბამისი დოკუმენტაციით) და ჰქონდეს საკუთარი გვერდები სოციალურ ქსელებსა თუ პლატფორმებზე. მუნიციპალიტეტთან დაკავშირებული მასალები, მიწოდებული შემკვეთის მიერ ან მომზადებული შემსრულებლის მიერ, ეთერში „პრაიმ-ტაიმში“ უნდა განთავსდეს.
ტელეკომპანია „ატვ-12“-მა (ATV-12), ფასის დაკლების შედეგად, ტენდერში 44 855,99 ლარით გაიმარჯვა (ტენდერის საწყისი ფასი 44 987 ლარი იყო).
ამ ფინანსური „დახმარების“ გარეშე ტელეარხი უბრალოდ დაიხურება, რადგან სარეკლამო ბაზარი საქართველოში მთლიანად, და კერძოდ ახალქალაქის მუნიციპალიტეტში, საკმაოდ შეზღუდულია. ამასთანავე, დღეს რეკლამისთვის გაცილებით მეტი უფასო და ეფექტური პლატფორმა არსებობს, ვიდრე 10 წლის წინ იყო.
ტელეარხი „ატვ-12“ (ATV-12) 2001 წელს ხუთმა დამფუძნებელმა შექმნა. ამ ხუთიდან ერთ-ერთი ტელეარხის ამჟამინდელი დირექტორი, ვალიკ ქთოიანია. თავის დროზე ტელეარხი ვითარდებოდა, ჰყავდა ბევრი ჟურნალისტი და გადაცემა. დროთა განმავლობაში დაფინანსება შემცირდა, კადრები კი წავიდნენ. ტელეარხის დაფუძნებაში მათ „ინტერნიუს საქართველო“ დაეხმარა. როგორც ვალიკ ქთოიანი იხსენებს, პირველი დიდი გრანტით ტექნიკა შეიძინეს. ტელეარხი დღემდე იმ ტექნიკას იყენებს, რომელიც 2001–2003 წლებში იყიდა. მისი თქმით, ბიუჯეტიდან მიღებული თანხა მხოლოდ ხელფასებისთვისაა საკმარისი, ტექნიკის განახლების საშუალება კი არ არსებობს.
„მაგალითად, საჭიროა ახალი, ციფრული მიქშერი. მიახლოებითი ფასი 6–7 ათასი აშშ დოლარია. აპარატურის ყიდვა ჩვენ არ შეგვიძლია, ეს გამორიცხულია. რეკლამა არ არის. კადრების დეფიციტი ახალქალაქში ყოველთვის იყო. ერთი თანამშრომელიც რომ წავიდეს, შემცვლელს ძლივს იპოვი. იმისთვის, რომ ტელევიზიამ ნორმალურად იმუშაოს, თუმცა ეს რთული საკითხია, 60–70 ათასი ლარია საჭირო. ადგილობრივი თვითმმართველობა კი არსებულზე მეტ თანხას არ გამოყოფს. რაც არის, არის, მიუხედავად იმისა, რომ მაყურებელს მათ შესახებ ინფორმაციას ვაწვდით. ამჟამად ჩვენთან 7–8 ადამიანი მუშაობს. თვეში 3000–3500 ლარს მხოლოდ ხელფასებზე ვხარჯავთ. გრანტი ბოლოს 10–15 წლის წინ მივიღეთ. ეს იყო ბოლო შემთხვევა, როდესაც აპარატურა ვიყიდეთ. აი, გაფუჭდა დისტანციური მიკროფონი და ახალქალაქის პირობებში მის შეკეთებასაც კი ვერ ვახერხებთ. არავინ არის ხელოსანი. მიკროფონის ღირებულება კი დაახლოებით 500 დოლარია“, — ამბობს „ატვ-12“-ის დირექტორი ვალიკ ქთოიანი.
ტელეკომპანია „ატვ-12“-მა (ATV-12) რამდენიმე წლის განმავლობაში მისამართი არაერთხელ შეიცვალა. ამჟამად ტელეარხს საკუთარი შენობა აქვს: ერთი ოთახი, სადაც მთელი გუნდია შეკრებილი, და მეორე ოთახი, რომელიც სტუდიისთვის უნდა გარემონტდეს, თუმცა ამისათვის სახსრები არ არსებობს.
ახალქალაქის მუნიციპალიტეტის ბიუჯეტის მიღებისას, დეპუტატებმა დაფინანსების გადახედვის ინიციატივა წამოაყენეს. მათი აზრით, ეს თანხა საკმარისი არ არის ტელეარხის ნორმალური ფუნქციონირებისთვის, რომელსაც ამჟამად საკადრო, ფინანსური, ტექნიკური და ფართთან დაკავშირებული პრობლემები აქვს.
