წინა, 2025 წლის შემოდგომაზე, №15 ყოფილ სამხედრო დასახლებაში ახალი პარკი ჩაბარდა ექსპლუატაციაში. თუმცა, პარკის ზოგიერთი ელემენტი ზამთრის გადაგორებამდეც კი დაიშალა. კონკრეტულად ვინ და როგორ უნდა აღმოფხვრას აღნიშნული ხარვეზები იმ პირობებში, როცა შესრულებული სამუშაოს ხარისხის საგარანტიო ვადა სამ წელს შეადგენს?
ახალქალაქში ახალი პარკებისა და სკვერების ჩაბარების შემდეგ, ხშირად დგება მათი შეკეთებისა და აღდგენის საჭიროება. ზოგჯერ ამაში ბრალი თავად მცხოვრებლებს მიუძღვით, რომლებიც არაჰუმანურად ეპყრობიან ყველაფერ ახალს, თუმცა, მეორე მხრივ, პასუხისმგებლობა მშენებლებსაც ეკისრებათ, რომლებიც სამუშაოს დაუდევრად ასრულებენ ან უხარისხო მასალებს იყენებენ.
ყოფილ №15 სამხედრო დასახლებაში მდებარე პარკის ბეტონის სკამებით სარგებლობა ადგილობრივებმა, ფაქტობრივად, ვერც მოასწრეს — რადგან ობიექტი ექსპლუატაციაში გასული წლის გვიან შემოდგომაზე შევიდა — ისინი უკვე იშლება. შეგახსენებთ, რომ პარკის მოწყობა ადგილობრივ ბიუჯეტს მილიონ ლარზე მეტი დაუჯდა და მისი მშენებლობა ორი წლის განმავლობაში მიმდინარეობდა. პარკის ჩაბარება ჯერ კიდევ სექტემბერში იგეგმებოდა, თუმცა ვადებმა გადაიწია და პროცესი ნოემბერში დასრულდა.
პროექტის განსახორციელებლად ტენდერი 2024 წლის 6 აგვისტოს გამოცხადდა. საერთო ღირებულებამ 1 138 507 ლარი შეადგინა. მშენებლობის დასრულება ორ წელზე იყო გათვლილი: 2024 წელს — 300 000 ლარი, ხოლო 2025 წელს — 838 507 ლარი. ტენდერში ახალციხურმა კომპანიამ, შპს „საგზაო-სამშენებლო სამმართველო №2“-მა გაიმარჯვა, რომლის შეთავაზებაც 1 104 352 ლარს შეადგენდა. ხელშეკრულება 2024 წლის 9 ოქტომბერს გაფორმდა. შესრულებული სამუშაოს ხარისხის საგარანტიო ვადა, მიღება-ჩაბარების აქტის ხელმოწერის დღიდან, სამ წელს განსაზღვრავდა.
ახალქალაქის მუნიციპალიტეტის ინფრასტრუქტურის, არქიტექტურისა და მშენებლობის სამსახურის უფროსის, არა მოვსისიანის განცხადებით, შპს „საგზაო-სამშენებლო სამმართველო №2“-მა, რომელმაც პარკი ააშენა, ყველა ხარვეზი მანამ უნდა აღმოფხვრას, სანამ მერია დარჩენილ საგარანტიო თანხას გადაიხდის.
როდესაც დათბება და ყველა ხარვეზი თვალსაჩინო გახდება… მათ აქვთ გადავადებული საგარანტიო თანხა — 2,5%, რაც საკმაოდ სოლიდური თანხაა. ისინი აღმოფხვრიან ყველა ნაკლოვანებას და მხოლოდ ამის შემდეგ მიიღებენ ამ თანხას. მათ აქვთ უფლება, მშენებლობის დასრულებიდან ერთი წლის შემდეგ გამოითხოვონ ეს თანხა, თუმცა გარანტია 3 წელს შეადგენს. თუ შემდგომში, ამ 3 წლის განმავლობაში, უხარისხოდ შესრულებული სამუშაოს ან მშენებლობის გამო რაიმე პრობლემა შეიქმნება, ჩვენ გვაქვს უფლება მოვითხოვოთ, რომ მათ ეს ხარვეზები და ნაკლოვანებები გამოსწორონ“, — განაცხადა არა მოვსისიანმა.
შეგახსენებთ, რომ ყოფილ №15 სამხედრო დასახლებაში პარკის მშენებლობის ორწლიანი პროექტი მრავალსართულიანი და მიმდებარე საცხოვრებელი სახლების მცხოვრებთა წერილობითი მიმართვის საფუძველზე დაიწყო. წერილში მოსახლეობა აღნიშნავდა, რომ უზარმაზარი ტერიტორია მიტოვებული იყო, საქანელები კი ჯერ კიდევ საბჭოთა დროიდან იყო შემორჩენილი, რის გამოც ბავშვებს სათამაშო ადგილი არ ჰქონდათ. საბოლოოდ, ახალქალაქის მერიამ პროექტის განსახორციელებლად დაფინანსება მოითხოვა, საკრებულომ კი თანხის გამოყოფა დაამტკიცა.
