მთავრობა იწყებს შესაბამისი ღონისძიებების შემუშავებას სახიფათო ნარჩენების განთავსებისთვის განკუთვნილი თანამედროვე პოლიგონის შესაქმნელად. აღნიშნულ საკითხთან დაკავშირებით უკვე გამოცემულია განკარგულება, რომელსაც ხელს პრემიერ-მინისტრი მოაწერს.
გარემოს დაცვისა და სოფლის მეურნეობის სამინისტროს დაევალა მყარი საყოფაცხოვრებო ნარჩენების პოლიგონის მუშაობის რეგულირებისთვის კონკრეტული ზომების შემუშავება.
აღსანიშნავია, რომ მისაღები ზომების ფარგლებში, უწყებამ უნდა უზრუნველყოს იაღლუჯის ფერდობზე (ქვემო ქართლი, რუსთავთან ახლოს), ქიმიური ნარჩენების ყოფილი პოლიგონის ტერიტორიაზე მდებარე მიწის ნაკვეთის სახელმწიფო საკუთრებად რეგისტრაცია.
კერძოდ, დოკუმენტის თანახმად, გარემოს დაცვისა და სოფლის მეურნეობის სამინისტრო პასუხისმგებელია შემდეგზე:
ა) შეიმუშაოს იმ ღონისძიებათა გეგმა, რომელიც აუცილებელია სახიფათო ნარჩენების სამარხი პოლიგონის შექმნის უზრუნველსაყოფად;
ბ) უზრუნველყოს იაღლუჯაში, ქიმიური ნარჩენების ყოფილი პოლიგონის ტერიტორიაზე მდებარე მიწის ნაკვეთის სახელმწიფო საკუთრებად რეგისტრაცია და მისი შპს „საქართველოს მყარი ნარჩენების მართვის კომპანიის“ კაპიტალში შეტანა;
გ) უზრუნველყოს სახიფათო ნარჩენების სამარხი პოლიგონის მშენებლობასა და ექსპლუატაციასთან დაკავშირებული ფუნქციებისა და მოვალეობების ასახვა შპს „საქართველოს მყარი ნარჩენების მართვის კომპანიის“ წესდებაში.
განკარგულების თანახმად, შემუშავებული ღონისძიებების განხორციელებაზე პასუხისმგებელია შპს „საქართველოს მყარი ნარჩენების მართვის კომპანია“.
გარდა ამისა, დოკუმენტში აღნიშნულია, რომ რეგიონული განვითარებისა და ინფრასტრუქტურის, იუსტიციის, ეკონომიკისა და მდგრადი განვითარების სამინისტროებმა, ისევე როგორც სახელმწიფო რწმუნებულებმა შესაბამის მხარეებში, ხელი უნდა შეუწყონ გარემოს დაცვისა და სოფლის მეურნეობის სამინისტროს განკარგულებით გათვალისწინებული ამოცანების შესრულებაში.
