2026 წელს, ახალქალაქის მუნიციპალიტეტის მერიის სოციალური პროგრამების ფარგლებში, მოქალაქეები მედიკამენტების შესაძენად ფინანსურ დახმარებას მიიღებენ. პროგრამა მიზნად ისახავს მოსახლეობის სოციალურად დაუცველი ჯგუფებისა და შეზღუდული შესაძლებლობის მქონე პირების მხარდაჭერას.
ფინანსური დახმარების მიღების უფლება აქვთ მოქალაქეთა შემდეგ კატეგორიებს:
სოციალურად დაუცველი ოჯახების ერთიან მონაცემთა ბაზაში რეგისტრირებული მოქალაქეები, რომელთა ოჯახის სარეიტინგო ქულა 0-დან 100 000-ის ჩათვლით არის (ამასთან, ოჯახის ფაქტობრივი მისამართი მითითებული უნდა იყოს ახალქალაქის მუნიციპალიტეტის ადმინისტრაციულ საზღვრებში).
მკვეთრად და მნიშვნელოვნად გამოხატული შეზღუდული შესაძლებლობის მქონე პირები (მუდმივი სტატუსით), რომლებსაც შეზღუდული აქვთ დამოუკიდებლად გადაადგილება (ეტლით მოსარგებლეები) ან საჭიროებენ სხვა პირის მუდმივ მზრუნველობას (მხედველობისა და სმენის დარღვევის მქონე, გონებრივი ჩამორჩენილობის, ფსიქიკური აშლილობის, ცერებრალური დამბლის, აუტიზმის, დაუნის სინდრომის, ეპილეფსიის მქონე და ბავშვობიდან შეზღუდული შესაძლებლობის მქონე პირები).
ამ მუხლით გათვალისწინებული სამედიცინო დახმარება დაფინანსდება შესაბამისი საჭიროებებისთვის აუცილებელი თანხის 50%-მდე ოდენობით, წელიწადში არაუმეტეს 500 (ხუთასი) ლარისა.
მოქალაქის მიერ წარდგენილ თითოეულ განცხადებაზე დაფინანსება გაიცემა არაუმეტეს სამი თვისთვის საჭირო მედიკამენტებზე, გარდა იმ პრეპარატებისა, რომლებიც შესულია „ქრონიკული დაავადებების მკურნალობისთვის მედიკამენტებით უზრუნველყოფის სახელმწიფო პროგრამაში“.
დახმარების მისაღებად განმცხადებელმა უნდა წარადგინოს შემდეგი დოკუმენტები:
ა) წერილობითი განცხადება (განმცხადებელი: ბენეფიციარი ან ოჯახის წევრი).
ბ) განმცხადებლის პირადობის დამადასტურებელი დოკუმენტის ასლი.
გ) ბენეფიციარის პირადობის დამადასტურებელი დოკუმენტის ასლი (არასრულწლოვნის შემთხვევაში – პირადობის მოწმობის და/ან დაბადების მოწმობის ასლი).
დ) ცნობა ჯანმრთელობის მდგომარეობის შესახებ (ფორმა №IV-100/ა).
ე) ინვოისი (ანგარიშ-ფაქტურა) და/ან კალკულაცია შესაბამისი დაწესებულებიდან და შესაბამისი საჭიროების დამადასტურებელი დოკუმენტი.
ვ) საყოველთაო ჯანდაცვის მართვის დეპარტამენტის ან სხვა სადაზღვევო კომპანიის მიერ გაცემული დაფინანსების მიმართვა (ასეთის არსებობის შემთხვევაში).
ზ) ბენეფიციარის ან კანონიერი წარმომადგენლის საბანკო ანგარიშის რეკვიზიტები (საჭიროების შემთხვევაში).
თ) ამონაწერი სოციალურად დაუცველი ოჯახების ერთიანი მონაცემთა ბაზიდან.
ი) შეზღუდული შესაძლებლობის სტატუსის დამადასტურებელი დოკუმენტი.
ანგარიშსწორება განხორციელდება ფარმაცევტული დაწესებულების საბანკო ანგარიშზე, ამავე დაწესებულების მიერ ბენეფიციარისთვის მიწოდებული მედიკამენტების რაოდენობისა და ღირებულების ამსახველი დოკუმენტების წარდგენის საფუძველზე. გარკვეულ შემთხვევებში, გადახდა შესაძლოა შესრულდეს უშუალოდ დახმარების მიმღების ან მისი კანონიერი წარმომადგენლის მიერ მითითებულ საბანკო ანგარიშზე.
