18 წლის ახალგაზრდა უკვე დაახლოებით ერთი კვირაა მკურნალობას თბილისის კლინიკა „ჯერარსში“ გადის. მისი ჯანმრთელობის გაუარესების მიზეზი ენერგეტიკული სასმელების მუდმივი მოხმარება გახდა. მან Jnews-ს მიმართა და მედიის საშუალებით მოუწოდებს თანატოლებს, არ დალიონ ეს სასმელები და არ გაიფუჭონ ჯანმრთელობა.
ახალგაზრდა ყვება, რომ ზედიზედ ექვსი დღის განმავლობაში ის დღეში შვიდ გადასხმას იღებდა.
„ეს სასმელები ენერგიას კი არ იძლევა, უბრალოდ მისი გემო იზიდავთ ახალგაზრდებს, მათ შორის არასრულწლოვნებსაც. საბოლოოდ კი ეს ჯანმრთელობის პრობლემებამდე მიდის“, — ამბობს ის.
მან ენერგეტიკული სასმელების სმა გასული წლიდან დაიწყო. თავიდან დღეში ორ ან სამ ქილას მოიხმარდა, შემდეგ კი ერთ ქილაზე გადავიდა. თუმცა, გასული წლის ნოემბერში, მათი მიღების შემდეგ, სისუსტე იგრძნო. გარკვეული პერიოდით შეწყვიტა მათი დალევა, მაგრამ გასულ თვეში კვლავ დაიწყო, რის შედეგადაც სისხლის წნევამ აუწია. მისი თქმით, მას დიდი ხნით ფეხით სიარულიც კი აღარ შეეძლო.
როდესაც თავი შეუძლოდ იგრძნო, სასწრაფო დახმარება გამოიძახეს, რომელმაც ის ჯერ ადგილობრივ საავადმყოფოში გადაიყვანა, ორი დღის შემდეგ კი თბილისში გადაამისამართეს. დღეს ის თავს შედარებით ნორმალურად გრძნობს.
„ახალგაზრდებს ვურჩევ, არ დალიონ ენერგეტიკული სასმელები. ჰგონიათ, რომ მათ არაფერი დაემართებათ, მაგრამ ცდებიან. მეც ასე ვფიქრობდი. ახლა ვნანობ, რომ ვსვამდი, მაგრამ ვერაფერს შეცვლი — წნევის პრობლემა დამრჩა“.
კითხვაზე, დაადასტურეს თუ არა ექიმებმა, რომ მისი მდგომარეობა სწორედ ენერგეტიკულმა სასმელებმა გამოიწვია, მან უპასუხა, რომ დიახ — მათი მიღების შემდეგ მას უძილობა და ნერვული აგზნებადობაც აწუხებდა.
