ახალციხეში მიმდინარე უწყვეტი საპროტესტო აქციების 335-ე დღეს, სამოქალაქო ბრძოლას ქვემო ქართლიდან ჩამოსული აქტივისტებიც შეუერთდნენ. ისინი ახალციხეში ადგილობრივი აქტივისტების სოლიდარობისა და მხარდაჭერის გამოსახატავად ჩავიდნენ.
ქვემო ქართლიდან ჩამოსულმა აქტივისტებმა დაახლოებით 100 კილომეტრიანი მსვლელობა მოაწყვეს, რომელიც რეგიონული ერთიანობისა და გაერთიანებული ბრძოლის სიმბოლოდ იქცა. მათი თქმით, ამ ინიციატივის მიზანია აჩვენოს, რომ სხვადასხვა რეგიონში მებრძოლი მოქალაქეები მარტო არ არიან და მზად არიან ერთმანეთის გვერდით იდგნენ.
აქტივისტები აცხადებენ, რომ მომავალში ისინი გეგმავენ საქართველოს სხვადასხვა რეგიონისა და ყველა მუნიციპალიტეტის მონახულებას, სადაც საპროტესტო აქციები მიმდინარეობს. მათი თქმით, ვიზიტები არა მხოლოდ მხარდაჭერის გამოსახატავად, არამედ ბრძოლაში ადამიანების წახალისებისა და ერთიანობის განცდის გასაძლიერებლად იქნება განკუთვნილი.
„ჩვენ ერთმანეთს მარტო არ ვტოვებთ უსამართლობის წინააღმდეგ ბრძოლაში. ერთად, გვერდიგვერდ დგომით, ჩვენ აღვადგენთ სამართლიანობას“, – აღნიშნავენ ინიციატივის მონაწილეები.
ახალციხეში მიმდინარე საპროტესტო აქცია უკვე სამოქალაქო წინააღმდეგობის დიდი ხნის მაგალითად იქცა და სხვადასხვა რეგიონიდან მიღებული მხარდაჭერა მიუთითებს, რომ მოძრაობა სცილდება ადგილობრივ წრეებს და იძენს ეროვნული სოლიდარობის ხასიათს.
ჰნაზიკ ავეტისიან
