აზიის განვითარების ბანკის მხარდაჭერით, შპს „ჯორჯიან მელიორაცია“ იწყებს მოსამზადებელ სამუშაოებს საქართველოში, მათ შორის სამცხე-ჯავახეთში, სარწყავი ინფრასტრუქტურის რეაბილიტაციისა და მოდერნიზაციის პროექტისთვის. კომპანიის ვებგვერდის ცნობით, ექსპერტებმა უკვე შეაფასეს რეგიონის ოთხ მუნიციპალიტეტში მოქმედი და გაუქმებული სისტემების მდგომარეობა.
ინიციატივა ხორციელდება აზიის განვითარების ბანკის (ADB) ფინანსური და ტექნიკური მხარდაჭერით და მიზნად ისახავს წყლის რესურსების ეფექტიანობის გაუმჯობესებას და რეგიონში სოფლის მეურნეობის განვითარებას.
19 ნოემბერს, შპს „ჯორჯიან მელიორაციის“ წარმომადგენლებმა, ADB-ის ექსპერტებთან ერთად, დაათვალიერეს ნინოწმინდის, ახალქალაქის, ახალციხისა და ასპინძის მუნიციპალიტეტების სარწყავი სისტემები. სპეციალისტებმა შეისწავლეს როგორც მოქმედი, ასევე გაუქმებული მონაკვეთები და შეაფასეს მათი მომსახურების არეალი.
„საველე კვლევის საფუძველზე, აზიის განვითარების ბანკის ექსპერტები მოამზადებენ წინასწარი შეფასების დოკუმენტებს. შემდეგი ნაბიჯი იქნება საპროექტო კვლევების შემუშავება, რომლებიც განსაზღვრავს სარწყავი ინფრასტრუქტურის აღდგენისა და მოდერნიზაციის ოპტიმალურ გზებს“, – ნათქვამია კომპანიის ოფიციალურ ვებსაიტზე გამოქვეყნებულ განცხადებაში.
კომპანიის ცნობით, სარწყავი სისტემების მოდერნიზაცია მნიშვნელოვნად გააუმჯობესებს ფერმერების წვდომას წყლის რესურსებზე, შეამცირებს წყლის დანაკარგებს და გაზრდის სოფლის მეურნეობის მდგრადობას ცვალებადი კლიმატური პირობების მიმართ. პროექტი მნიშვნელოვანი ნაბიჯი იქნება რეგიონში სასურსათო უსაფრთხოების განმტკიცებისა და წყლის უფრო ეფექტური გამოყენების უზრუნველყოფის მიმართულებით.
ახალქალაქსა და ნინოწმინდაში განსახორციელებელი სამუშაოების თარიღებისა და მასშტაბის დეტალები ამჟამად უცნობია.
ამჟამად ახალქალაქის მუნიციპალიტეტში შვიდი სარწყავი სისტემა ფუნქციონირებს:
1. ლომატურცხის სარწყავი სისტემა (გრავიტაციული) ემსახურება სოფლებს: ალათუმანი, კაჯო, ღადოლარი, ლომატურცხი, ტურცხი, კოთელია და ხანდო.
2. კოთელიას სარწყავი სისტემა (მექანიკური) ემსახურება სოფელ კოთელიას და უკავშირდება ლომატურცხის სისტემას.
3. ზაკის სარწყავი სისტემა (მექანიკური) ემსახურება სოფლებს: ზაკი, კოთელია, არაგვა, ორჯა, ხანდო და უკავშირდება ლომატურცხის სარწყავ სისტემას.
4. ალმალი-მურჯახეთის სარწყავი სისტემა (მექანიკური და გრავიტაციული) ემსახურება სოფლებს: ხოსპიო, მურჯახეთი, ვაჩიანი, ჩამდურა, კიროვაკანი, კულიკამი, კარტიკამი, ასევე ნინოწმინდის მუნიციპალიტეტის სოფელ ღულალისს.
5. ოკამის სარწყავი სისტემა (მექანიკური) ემსახურება სოფლებს: ოკამი, ქარსეპი, გოგაშენი და აფნია.
6. დილისკა-პტენა-ჩუნჩხას სარწყავი სისტემა (მექანიკური) ემსახურება დილისკას, პტენას და ჩუნჩხას სოფლებს.
7. ზრესის სარწყავი სისტემა (მექანიკური) ემსახურება დილისკას, ჩამდურას, კიროვაკანის, კუმურდოს და ვაჩიანის სოფლებს.
