ახალქალაქის მუნიციპალიტეტმა სახელმწიფოს გადასცა სოფლების ორჯასა და არაგვას სატუმბი სადგურები, ასევე სოფელ ხანდოს ორი წყალსაცავი. ამ ობიექტებს მოემსახურება გაერთიანებული მელიორაციის სამცხე-ჯავახეთის მომსახურების ცენტრი, რადგან მათი მოვლა-პატრონობა ადგილობრივი ბიუჯეტისთვის ძალიან ძვირია.
24 ნოემბერს საკრებულოს დეპუტატებმა დაამტკიცეს ქონების სახელმწიფოსთვის გადაცემა შემდგომი გაერთიანებული მელიორაციის მომსახურების ცენტრის ბალანსზე გადატანით.
გადაეცა შემდეგი ობიექტები:
• სოფელ ორჯას სატუმბი სადგური ტრანსფორმატორით,
• სოფელ არაგვას სატუმბი სადგური,
• სოფელ ხანდოს ორი წყალსაცავი.
ახალქალაქის მუნიციპალიტეტის ეკონომიკური განვითარების, დაგეგმვისა და ქონების მართვის სამსახურის უფროსმა, მნაცაკან ფამბუხჩიანმა აღნიშნა, რომ ეს გადაწყვეტილება სოფლის მოსახლეობის ინტერესებიდან გამომდინარე იქნა მიღებული, რადგან ამ შემთხვევაში მათ სახელმწიფო სუბსიდიებით სარგებლობა შეეძლებათ.
„ადგილობრივი ხელისუფლება ვერ აიღებს ამ ობიექტების მოვლა-პატრონობას და თუ ისინი გადაეცემათ, სოფლის მოსახლეობა სუბსიდიის გამოყენებას შეძლებს. ერთი ჰექტარის მორწყვა 75 ლარი დაჯდება. თუ მოვლა-პატრონობა მუნიციპალიტეტს დარჩება, მომსახურება მნიშვნელოვნად გაძვირდება. ამიტომ, გადავწყვიტეთ, მოსახლეობის ინტერესებიდან გამომდინარე გვემოქმედა. სოფელ არაგვაში არსებული სატუმბი სადგური ამჟამად არ ფუნქციონირებს და საჭიროებს შეკეთებას. ასევე, ხანდოში ჩვენს წყალსაცავს გადავიტანთ, რომელიც შარშანწინ ავაშენეთ“, – განმარტა მნაცაკან ფამბუხჩიანმა.
სოფელ ხანდოში არსებული ორი წყალსაცავის ფართობი 61,691 კვადრატული მეტრია.
მუნიციპალიტეტის ცნობით, ორი წლის განმავლობაში ისინი სამცხე-ჯავახეთის გაერთიანებული მელიორაციის მომსახურების ცენტრს სთავაზობდნენ, რომ სოფლებში ორჯასა და არაგვაში არსებული სატუმბი სადგურები მათ ბალანსში ჩაეთვალათ, თუმცა უარი მიიღეს. ახლა შეთანხმება მიღწეულია იმ პირობით, რომ ხანდოში არსებული ორი წყალსაცავიც გადაეცემა.
ადგილობრივი ხელისუფლება იმედოვნებს, რომ ობიექტების გაერთიანებული მელიორაციისთვის გადაცემა შეამცირებს სარწყავი ხარჯების რაოდენობას, რაც, საბოლოო ჯამში, კარტოფილის ფასს შეამცირებს და ჯავახეთის პროდუქციის კონკურენტუნარიანობას ბაზარზე გაზრდის.
სოფელ ტურცხის წყალსაცავები საქართველოს მელიორაციის კომპანიის ბალანსზე გადავიდა
