ქალაქის მაცხოვრებლები აღნიშნავენ, რომ ბოლო დროს ხშირი ელექტროენერგიის გათიშვა და ძაბვის ცვალებადობა ელექტრო ტექნიკის სწრაფ გაფუჭებას იწვევს.
„თვის განმავლობაში უკვე ექვსი ნათურა შევცვალე, გაფუჭდა გათბობის ქვაბი, რომელიც ახალი ნაყიდი მქონდა. სარეცხი მანქანაც ხშირად ფუჭდებოდა, ყოველთვის ხელოსანს ვიძახებდი. ახლა ახალი ვიყიდე, მაგრამ შუქი მაინც ზოგჯერ ითიშება, როცა სარეცხი ჯერ არ დამთავრებულა, მეშინია, ისევ არ დაზიანდეს“, — ამბობს ქალაქის მცხოვრები ქალბატონი ჰაიკანუშ დარბინიანი.
Jnews-მა სცადა გაერკვია, შეიძლება თუ არა ელექტროენერგიის არასტაბილურობამ — ხშირმა გათიშვამ და ძაბვის ცვალებადობამ — დააზიანოს საყოფაცხოვრებო ტექნიკა.
სპეციალისტების თქმით, დენის უბრალო გათიშვა მოწყობილობას არ აფუჭებს. ეს ჰგავს ტელევიზორის ჩვეულებრივი წესით გამორთვას.
ელექტრიკოსები ნათურების სწრაფ გაფუჭებას ძირითადად ხარისხსა და გაცხელების რეჟიმებს უკავშირებენ. იაფფასიან ნათურებს ხშირად არ აქვთ დამცავი ფენები და გაცხელებისას სწრაფად იწვებიან. დენის მკვეთრი მატების შემთხვევაში ნათურა შეიძლება გასკდეს ან მოკლე ჩართვა გამოიწვიოს, თუმცა სუსტი რყევები ზიანს არ აყენებს.
„ნათურის გაფუჭება უფრო მეტად მწარმოებლის ხარისხთან არის დაკავშირებული. ძვირადღირებული ნათურები უფრო დიდხანს ემსახურება თავის დანიშნულებას და უფრო მდგრადია დენის ცვალებადობის მიმართ“, — აღნიშნავენ გამყიდველები.
თუმცა, თუ დენის მიწოდებისას ხდება ძაბვის მკვეთრი მატება ან დენის ხშირი ცვალებადობა, მათ შეუძლიათ დააზიანონ მოწყობილობის ელექტრონული სისტემა.
„ბოლო წლებში ბაზარზე შემოდის და ფართოდ გამოიყენება არაორიგინალი, დაბალხარისხიანი ჩინური მოწყობილობები. შედეგად, ასეთი მოწყობილობები ვერ უძლებენ ოდნავ რყევებსაც კი და სწრაფად ფუჭდება“, — ამბობს ელექტრიკოსი, რომელმაც ვინაობის გამხელისაგან თავი შეიკავა. მან დაამატა, რომ განსაკუთრებით დაუცველია: მაცივრების კომპრესორები, გაზის ქვაბების მართვის პლატები, სარეცხი მანქანების პროგრამული მოდულები.
რეკომენდირებულია ძაბვის სტაბილიზატორის (stabilizer) ან UPS სისტემის გამოყენება დენის მატების გასანეიტრალებლად.
ასევე მნიშვნელოვანია გვესმოდეს, შეესაბამება თუ არა გარედან იმპორტირებული ტექნიკა ადგილობრივი დენის სტანდარტებს და შეიძლება თუ არა ეს გახდეს მოწყობილობების სწრაფი გადაწვის მიზეზი.
ადგილობრივი ტექნიკის გამყიდველები აღნიშნავენ, რომ მსოფლიოში მიღებული ძაბვა არის 220 ვოლტი, და რომ პროდუქტებზე სწორედ ეს ნიშანია: Input: 220–240V, 50Hz.
„მხოლოდ ამერიკული ტექნიკაა განკუთვნილი 60Hz სიხშირისთვის, მაგრამ ასეთი პროდუქტები ჩვენს ბაზარზე არ იყიდება. მაღალი ხარისხის პროდუქტებს ასევე აქვთ ჩაშენებული ძაბვის რეგულატორი (built-in stabilizer), რომელიც იცავს მოწყობილობას დენის არასტაბილურობისგან“, — ამატებს ერთ-ერთი გამყიდველი.
ახალქალაქის სახლებში ელექტროენერგია ძირითადად დადგენილ ნორმებს შეესაბამება. მიუხედავად იმისა, რომ მძლავრი მოწყობილობების ჩართვისას დენი გარკვეულწილად სუსტდება, გამოყენებაზე შეზღუდვები ან აკრძალვები არ არსებობს: თითოეულ მაცხოვრებელს შეუძლია თავისუფლად ისარგებლოს დენით და ჩართოს ნებისმიერი მოწყობილობა საჭიროებისამებრ. ზოგჯერ მეზობლების შედუღების ან მძლავრი ელექტრო მოწყობილობების მუშაობის დროს დენის ძაბვა მერყეობს, მაგრამ საერთო ჯამში დენის მიწოდებაზე შეზღუდვები არ გამოიყენება.
„ყველა სახლისთვის გათვალისწინებულია დაახლოებით 220 ვოლტი დენი, დასაშვები ±10–15% ცვალებადობით. ანუ, 190-დან 240 ვოლტამდე დიაპაზონი ნორმალურად ითვლება. თუ ასეთი ძაბვა გაიზომება ქალაქის სხვადასხვა სახლში, თითქმის ყველა ამ საზღვრებში იქნება. საყოფაცხოვრებო ტექნიკა დაპროექტებულია იმისთვის, რომ იმუშაოს სწორედ ამ დიაპაზონში და მცირე რყევებით არ ფუჭდება. როდესაც ერთდროულად ირთვება რამდენიმე მაღალი სიმძლავრის მოწყობილობა, მაგალითად, გამათბობელი, წყლის გამაცხელებელი, სარეცხი მანქანა, დენი შეიძლება დასუსტდეს 10%-მდე, მაგრამ ეს ჩვეულებრივ არ აზიანებს მოწყობილობებს“, — განმარტავს ერთ-ერთი ელექტრიკოსი.
ახალქალაქის იმ სოფლებში, სადაც გაზიფიცირება ჯერ არ არის, შეინიშნება, რომ დენი საკმაოდ სუსტია. ეს გამოწვეულია ელექტრო გამათბობლების ფართო გამოყენებით. კომპანია „ენერგო-პრო ჯორჯიას“ ერთ-ერთმა თანამშრომელმა დაგვარწმუნა, რომ პრობლემა მალე მოგვარდება: უახლოეს მომავალში დაგეგმილია რამდენიმე სოფელში უფრო მძლავრი ელექტროგადამცემი ხაზების დამონტაჟება, სტაბილური ძაბვის უზრუნველსაყოფად.
ჰნაზიკ ავეტისისან
