საქართველოს პროკურატურის ინფორმაციით, 5 პირს, კერძოდ, მოძრაობა „რუსთაველის გამზირის“ ლიდერებს – პაატა ბურჭულაძეს, მურთაზ ზოდელავას, „ერთიანი ნაციონალური მოძრაობის“ წევრს – ირაკლი ნადირაძეს, „სტრატეგია აღმაშენებლის“ ერთ-ერთ ლიდერს – პაატა მანჯგალაძეს და პოლკოვნიკ ლაშა ბერიძეს, რომლებიც 4 ოქტომბრის საპროტესტო აქციის საორგანიზაციო კომიტეტის შემადგენლობაში შედიოდნენ, ბრალი წარედგინათ ჯგუფური ძალადობის ორგანიზებისა და ხელმძღვანელობის, სტრატეგიული და განსაკუთრებული მნიშვნელობის ობიექტის ხელში ჩაგდების მცდელობის, აგრეთვე, კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ მოწოდების ფაქტებზე. აღნიშნული დანაშაულების ჩადენისთვის გათვალისწინებულია სასჯელი 9 წლამდე თავისუფლების აღკვეთის სახით.
საქართველოს შინაგან საქმეთა სამინისტროში ჩატარებული გამოძიების ფარგლებში დადგინდა, რომ პაატა ბურჭულაძე, მურთაზ ზოდელავა და ირაკლი ნადირაძე, მოქმედი ხელისუფლების მიმართ აგრესიულად განწყობილი მოქალაქეების მობილიზაციის, შეკრებისა და ძალადობრივ ქმედებებში ჩართვის მიზნით, ადგილობრივი თვითმმართველობის ორგანოების არჩევნებამდე რამდენიმე დღით ადრე საჯაროდ მოუწოდებდნენ კონსტიტუციური წყობის ძალადობით შეცვლისა და სახელმწიფო ხელისუფლების დამხობისკენ. კერძოდ, ირაკლი ნადირაძე, პაატა ბურჭულაძე და მურთაზ ზოდელავა საზოგადოებას მოუწოდებდნენ რევოლუციის აუცილებლობისკენ, რომელშიც აგრესიულად განწყობილი მოქალაქეები უნდა ჩართულიყვნენ. მათი განცხადებების თანახმად, ისინი ერთად უნდა დაემხოთ სახელმწიფო ხელისუფლება, ხოლო აღნიშნული ქმედებების ეფექტიანად განხორციელებისთვის აუცილებელი იყო მოქალაქეთა გარკვეული ჯგუფების მასობრივი ჩართულობა და გაერთიანება.
გამოძიებით ასევე დადგინდა, რომ არჩევნების დღეს, 4 ოქტომბერს, პაატა ბურჭულაძემ, მურთაზ ზოდელავამ, ირაკლი ნადირაძემ, ლაშა ბერიძემ, პაატა მანჯგალაძემ და სხვებმა მიიღეს გადაწყვეტილება ძალადობრივი მოქმედებების დაწყების შესახებ და მედიასაშუალებებით განაცხადეს, რომ სწორედ მათ მოაწყვეს და ხელმძღვანელობდნენ ამ ძალადობრივ ქმედებებს.
მურთაზ ზოდელავას, პაატა ბურჭულაძეს და ირაკლი ნადირაძეს ბრალი წარედგინათ საქართველოს სისხლის სამართლის კოდექსის შემდეგი მუხლებით:
მუხლი 19-222, მე-2 ნაწილის, „ა“ ქვეპუნქტი (სტრატეგიული და განსაკუთრებული მნიშვნელობის ობიექტის ხელში ჩაგდებისა და ბლოკირების მცდელობა, ჩადენილი ჯგუფურად);
მუხლი 225, 1-ლი ნაწილი (ჯგუფური ძალადობის ორგანიზება და ხელმძღვანელობა);
მუხლი 317 (მოწოდება კონსტიტუციური წყობილების ძალადობით შეცვლისა და სახელმწიფო ხელისუფლების დამხობისკენ).
რაც სასჯელის სახით ითვალისწინებს 9 წლამდე თავისუფლების აღკვეთას.
ლაშა ბერიძეს ბრალი წაუყენეს 19-222 მუხლის მე-2 ნაწილის „ა“ ქვეპუნქტით (პირთა ჯგუფის მიერ სტრატეგიული ან განსაკუთრებული მნიშვნელობის ობიექტის ჩამორთმევისა და დაბლოკვის მცდელობა) და 225-ე მუხლის პირველი ნაწილით (ჯგუფური ძალადობის ორგანიზება და ხელმძღვანელობა), რაც ცხრა წლით თავისუფლების აღკვეთას ითვალისწინებს.
პაატა მანჯგალაძეს ბრალი წაუყენეს 225-ე მუხლის პირველი ნაწილით (ჯგუფური ძალადობის ორგანიზება), რაც ცხრა წლით თავისუფლების აღკვეთას ითვალისწინებს.
„საქართველოს შინაგან საქმეთა სამინისტრო აგრძელებს გამოძიებას ამ დანაშაულების ჩადენაში მონაწილე სხვა პირების დასადგენად“, – განაცხადა პროკურატურამ.
