ცენტრალურმა საარჩევნო კომისიამ დაასრულა ერთიანი ამომრჩეველთა სიის შედგენაზე მუშაობა. ამასთან დაკავშირებით, დღეს, ცენტრალურ საარჩევნო კომისიაში ნათია იოსელიანის პრესისთვის გამოსვლა გაიმართა.
„როგორც საზოგადოებისთვის ცნობილია, ერთიანი ამომრჩეველთა სიის ფორმირება სხვადასხვა დეპარტამენტის მიერ მოწოდებული ინფორმაციის საფუძველზე ხორციელდება. გვსურს მადლობა გადავუხადოთ ყველა ადმინისტრაციულ ორგანოს ამ პროცესში მჭიდრო თანამშრომლობისა და კოორდინაციისთვის. ასევე მადლობას ვუხდით ამომრჩევლებს მათი აქტიურობისთვის. მონაცემთა დადასტურებისა და სიის დახვეწის პროცესში შეტანილი წვლილისთვის.
4 ოქტომბერს ადგილობრივი თვითმმართველობის არჩევნებში მონაწილე ამომრჩეველთა საერთო რაოდენობა 3,513,818-ია. ელექტრონული ტექნოლოგიების გამოყენებით არჩევნებში 3,130,348 ამომრჩეველი მიიღებს მონაწილეობას.
წელს არჩევნებში პირველად 47,000 ახალგაზრდამ მიიღო მონაწილეობა.
საარჩევნო კომისიას 60,754 ამომრჩეველმა მიმართა.
რესპუბლიკის მასშტაბით 3,061 საარჩევნო უბანი გაიხსნა, საიდანაც 2,284 საარჩევნო უბანი ელექტრონულად ჩატარდება, ხოლო 777 – ტრადიციული წესით.
მათ შორისაა გამონაკლის შემთხვევებში შექმნილი 10 საარჩევნო უბანი, რომლებიც სასჯელაღსრულების დაწესებულებებში იხსნება.
არჩევნების გამოცხადების დღიდან ამომრჩევლებმა ერთიანი ამომრჩეველთა სიის მონაცემები ცესკოს ვებგვერდსა და მობილურ აპლიკაციაში 600 784-ჯერ, ხოლო 25 აგვისტოდან 16 სექტემბრამდე სწრაფი გადახდის აპარატების მეშვეობით 9 524-ჯერ გადაამოწმეს. მას შემდეგ, რაც საარჩევნო ადმინისტრაციამ სიები ყველა შესაბამისი დეპარტამენტიდან მიიღო, ზემოაღნიშნული მონაცემები დამუშავდა და განაწილდა საარჩევნო ოლქებისა და საარჩევნო უბნების მიხედვით. ამჟამად, განახლებული ერთიანი ამომრჩეველთა სია ყველა დაინტერესებული პირისთვის ხელმისაწვდომია ცესკოს ოფიციალურ ვებგვერდზე.
ასევე მნიშვნელოვანია აღინიშნოს, რომ ამომრჩეველთა სიებზე უნივერსალური წვდომის შესაძლებლობა ხელმისაწვდომია საარჩევნო კანონმდებლობით განსაზღვრული რეგისტრირებული პარტიებისა და სადამკვირვებლო ორგანიზაციებისთვის. ამომრჩევლებს აქვთ შესაძლებლობა, სიის საჯაროდ ხელმისაწვდომ ვერსიას უშუალოდ საარჩევნო უბნებზე გაეცნონ.
საარჩევნო წლის განმავლობაში, 5 პარტიამ სხვადასხვა დროს საარჩევნო ადმინისტრაციას ერთიანი ამომრჩეველთა სია მოსთხოვა, რაც ადასტურებს, რომ ამომრჩეველთა სიაზე წვდომა კანონმდებლობისა და საერთაშორისო სტანდარტების შესაბამისად განხორციელდა“, – განაცხადა ნათია იოსელიანმა.
ფენია თოროსიან
