ახალქალაქის მუნიციპალიტეტში 4 ოქტომბრის არჩევნები მინიმალური კონკურენციით ჩატარდება: მაჟორიტარულ ოლქებში მხოლოდ „ქართული ოცნების“ კანდიდატები არიან წარმოდგენილი, ხოლო მერობის ერთადერთი კანდიდატი ასევე მმართველი პარტიის მიერ არის წარდგენილი. პროპორციული სიით არჩევნებში მხოლოდ ოთხი პარტია მონაწილეობს. Jnews-მა ევროსაბჭოს ექსპერტ დავით ლოსაბერიძეს ესაუბრა იმის შესახებ, თუ რამდენად ეფექტური იქნება ადგილობრივი თვითმმართველობა ამ პირობებში და როგორ იმოქმედებს ეს მომავალი საკრებულოს მუშაობაზე.
ახალქალაქის მუნიციპალიტეტის ყველა მაჟორიტარულ ოლქში მხოლოდ „ქართულმა ოცნებამ“ წარადგინა კანდიდატები და ასევე წარადგინა 30 კანდიდატისგან შემდგარი სია პროპორციული საარჩევნო სისტემით. ახალქალაქის არჩევნებში „ქართული ოცნების“ გარდა, კიდევ სამი პარტია მონაწილეობს, თუმცა მხოლოდ პროპორციული საარჩევნო სისტემით. ესენია: „საქართველოს პატრიოტთა ალიანსი“ რვა კანდიდატისგან შემდგარი სიით, „ძლიერი საქართველო – ლელო“ ცხრა კანდიდატისგან შემდგარი სიით და „გახარია საქართველოსთვის“ შვიდი კანდიდატისგან შემდგარი სიით.
არჩევნების შემდეგ, ახალი საკრებულო 38 დეპუტატისგან შედგება: 23 მაჟორიტარული და 15 პროპორციული წესით აირჩევა.
როგორი იქნება საკრებულო ასეთ სიტუაციაში? ამ კითხვას უპასუხა ევროპის საბჭოს ადგილობრივი თვითმმართველობის ექსპერტმა დავით ლოსაბერიძემ.
მისი თქმით, მაშინაც კი, თუ ადგილების უმრავლესობას ერთი პოლიტიკური ძალა აკონტროლებს, ეს სრულ მმართველობას არ ნიშნავს.
„ჩვენ რეალურად დეცენტრალიზაცია არ გვაქვს. ყველაფერი ცენტრზეა დამოკიდებული. ცენტრში კი ქაოსია, სხვადასხვა ფრაქცია და მათ შორის უთანხმოებაა. მაშინაც კი, თუ ადგილობრივი ხელისუფლება ეფექტურად იმუშავებს, ბევრი რამ მაინც ცენტრალურ აღმასრულებელ ხელისუფლებაზე იქნება დამოკიდებული, იმაზე, თუ ვინ გასცემს ბრძანებებს ცენტრიდან. არსებული სისტემა დიდხანს არ გაძლებს. ის უნდა შეიცვალოს“, – აღნიშნა ლოსაბერიძემ.
ექსპერტმა დასძინა, რომ საერთაშორისო პირობებში ცვლილებები გარდაუვალია და ძნელია იმის პროგნოზირება, თუ რა მიმართულებით შეიცვლება ისინი.
„ეს წესრიგი დიდხანს ვერ გაგრძელდება. ახალი ლიდერი მოვა, ახალი „ხალხის მამა“ იქნება“, – დაასკვნა დავით ლოსაბერიძემ.
