2025 წლის ეროვნული მასწავლებლის ჯილდოს ხუთი ფინალისტი გამოვლინდა, ნომინანტებს შორის, რომელთაგან ერთ-ერთი 15 000 ლარის პრიზს მიიღებს, ახალქალაქიდან მასწავლებელი ჟანა ხაჩატურიანია.
წელს ეროვნული მასწავლებლის ჯილდოს შესარჩევი კონკურსის 2455 მასწავლებელი მონაწილეობდა, საიდანაც 10 საუკეთესო მასწავლებელი შეირჩა, შემდეგ კი ფინალში 5 მონაწილე გადავიდა, საიდანაც გამარჯვებული შეირჩევა.
წლევანდელი „ეროვნული მასწავლებლის ჯილდოს“ ფინალისტები არიან:
– ჟანა ხაჩატურიანი, ახალქალაქის ილია ჭავჭავაძის სახელობის მე-3 საჯარო სკოლის „მე და საზოგადოება“ სამოქალაქო განათლებისა და საზოგადოებრივი მეცნიერებების მასწავლებელი.
– ელენე ბეთლემიშვილი, გორის #3 და #8 საჯარო სკოლების დაწყებითი კლასების მასწავლებელი.
– ნესტან კუბლაშვილი, თბილისის #172 საჯარო სკოლის ქართული ენისა და ლიტერატურის მასწავლებელი.
– მაია ლაპიაშვილი, დედოფლისწყაროს #1 საჯარო სკოლის გეოგრაფიისა და სამოქალაქო განათლების მასწავლებელი.
– შალვა მინდაძე, თბილისის #70 საჯარო სკოლის ისტორიის მასწავლებელი.
ჟანა ხაჩატურიანის გადაწყვეტილება კონკურსში მონაწილეობის შესახებ შემთხვევითი არ ყოფილა, ამის შესახებ დამატებითი ინფორმაციისთვის იხილეთ სტატია „ჟანა ხაჩატურიანი ახალქალაქიდან – საქართველოს ათ საუკეთესო მასწავლებელს შორის“.
მასწავლებლის ეროვნული პრემია საქართველოში 2017 წლის 13 მაისს დაარსდა. ინიციატივა გლობალური კამპანიის „მასწავლებლის გლობალური პრემიის“ ნაწილია. პრემიის მიზანია პროფესიის პოპულარიზაცია საქართველოში, მასწავლებლის პრესტიჟის ამაღლება, წარმატებული მასწავლებლების გამოვლენა და საზოგადოებისთვის მათი გაცნობა.
