ბოლო თვეების განმავლობაში, საქართველოში სურსათის ფასები რიგ სექტორებში გაიზარდა. ეს პროცესი გარკვეულწილად აისახა ინფლაციის მაჩვენებელზე, რომელმაც მარტში პროგნოზირებულ 3%-ს გადააჭარბა, ხოლო ფასების ზრდამ წლიურად 3.5% შეადგინა.
საქართველოს ეროვნული ბანკი ასევე პროგნოზირებს ინფლაციის სამიზნე დონეზე მაღალ მაჩვენებელს. საქართველოს ეროვნული ბანკის მონეტარული პოლიტიკის კომიტეტის 30 ივლისის ბოლო გადაწყვეტილებაში ნათქვამია, რომ ქვეყანაში 2025 წელს საშუალო ინფლაციის მაჩვენებელი 3.8% იქნება. „წელს ინფლაცია 3%-იან სამიზნე დონეზე მაღალი დარჩება, თუმცა მომავალში მოსალოდნელია, რომ ის 3%-ს მიუახლოვდება“, – ნათქვამია გადაწყვეტილებაში.
„საქსტატის“ ბოლო მონაცემებით, აგვისტოში წლიური ინფლაცია 4.6%-ს შეადგენდა.
ბიზნესმენების მოლოდინების შესახებ და იმის შესახებ, ელოდებიან თუ არა კომპანიები ფასების შემდგომ ცვლილებებს, „ბიზნეს პრეს ნიუსმა“ დისტრიბუტორთა ასოციაციის პრეზიდენტ ლაშა რიჟამაძეს ესაუბრა.
როგორც რიჟამაძე აღნიშნავს, თუ მიწოდების მოცულობაში, ლარის კურსში ან გლობალურ ფასებში მნიშვნელოვანი რყევები არ იქნება, ფასების შემდგომი ზრდა აღარ იქნება.
„როდესაც ინფლაციის მაჩვენებელი განახლდა, ფასების ცვლილება და ზრდა ძირითადად წარმოებაზე აისახა. წლის დასაწყისიდან ვამბობდით, რომ პროდუქციის ფასები კიდევ უფრო გაიზრდება. რაც შეეხება უახლოესი მომავლის მოლოდინებს, თუ მნიშვნელოვანი რყევები არ იქნება, თუნდაც ლარის კურსთან ან უცხოურ ფასებთან მიმართებაში, კომპანიები ფასების ცვლილებას არ ელიან.“
„ფასების ცვლილების თვალსაზრისით, მნიშვნელოვანი იყო ონლაინ მაღაზიების მიერ კონტრაქტების გადახედვისა და დამატებითი საკომისიოს დაკისრების პროცესი. ეს პროცესი ასევე დიდ გავლენას ახდენს საქონლის ფასზე. შესაბამისად, თუ მნიშვნელოვანი რყევები არ გვაქვს, ყოველ შემთხვევაში, ტრანსპორტირების თვალსაზრისით, ამ ეტაპზე ფასების მნიშვნელოვანი ცვლილებები არ იგეგმება“, – განაცხადა ლაშა რიჟამაძემ „ბიზნეს პრეს ნიუსთან“ ინტერვიუში.
