საქართველოში ემიგრაციიდან დაბრუნებულ მოქალაქეებს საშუალება ექნებათ, სახელმწიფოსგან უფასოდ მიიღონ სასოფლო-სამეურნეო ტექნიკა და აღჭურვილობა საკუთარი ბიზნესის დასაწყებად. ამის შესახებ ინფორმაციას შრომის, ჯანმრთელობისა და სოციალური დაცვის სამინისტრო ავრცელებს.
აღნიშნული ინიციატივა ხორციელდება საზღვარგარეთ დიდი ხნის განმავლობაში მცხოვრები და მომუშავე თანამემამულეების რეინტეგრაციის პროგრამის ფარგლებში. მის განხორციელებაზე პასუხისმგებელია დევნილთა, ეკომიგრანტთა და საარსებო წყაროებით უზრუნველყოფის სააგენტო.
პროგრამის თანახმად, ყოველწლიურად 200-მდე დაბრუნებულ მიგრანტს გადაეცემა სხვადასხვა ტექნიკა და ინვენტარი, რაც მათ შემოსავლის წყაროს შექმნაში დაეხმარება. პირველ ეტაპზე სხვადასხვა რეგიონის 80-მა მოქალაქემ უკვე მიიღო ხელის ტრაქტორები.
სააგენტო ყოფილ ემიგრანტებს სხვა შესაძლებლობებსაც სთავაზობს. კერძოდ, მათ პერიოდულად, კონკურსის წესით, ეძლევათ მცირე გრანტები საკუთარი ბიზნესის დასაწყებად ან გასაფართოებლად, ასევე დროებითი საცხოვრებლით უზრუნველყოფის, სამედიცინო დახმარების და პროფესიული განათლების მისაღებად.
