2025 წლის 4 ოქტომბერს საქართველოში ადგილობრივი თვითმმართველობის არჩევნები გაიმართება. პარტია „ქართული ოცნება“ ნინოწმინდის მოქმედ მერს, ანივარდ მოსოიანს, მერობის კანდიდატად მესამედ წარადგენს. Jnews-მა, ღია მონაცემთა ბაზებზე დაყრდნობით, მის ბიოგრაფიაზე, პოლიტიკურ კარიერასა და რეგისტრირებულ ქონებაზე შეაგროვა ინფორმაცია.
ბიოგრაფია
ანივარდ (ანი) მოსოიანი დაიბადა 1974 წელს, ბოგდანოვკაში. 1991 წელს დაამთავრა ნინოწმინდის №2 საშუალო სკოლა. 1996 წელს დაამთავრა ერევნის ეკონომიკისა და სამართლის უნივერსიტეტი და მიიღო ფსიქოლოგის დიპლომი. 2000 წელს დაამთავრა თბილისის უნივერსიტეტი „გაენათი“ და მიიღო ფსიქოლოგისა და ქართული ენის მასწავლებლის კვალიფიკაცია.
1994-დან 2017 წლამდე მუშაობდა ქართული ენის მასწავლებლად ნინოწმინდის №1 საშუალო სკოლაში. 2008-2009 წლებში იყო ამავე სკოლის დირექტორი. 2009-დან 2011 წლამდე ეკავა ნინოწმინდის მუნიციპალიტეტის რესურს-ცენტრის ხელმძღვანელის თანამდებობა. დაქორწინებულია, ჰყავს ერთი ვაჟი და ერთი ქალიშვილი. მისი მეუღლე ნინოწმინდის სახანძრო სამსახურში მუშაობს.
პოლიტიკური საქმიანობა
2014 წელს ანივარდ მოსოიანმა პოლიტიკური კარიერა დაიწყო პარტიაში „ქართული ოცნება – დემოკრატიული საქართველო“. 2014-დან 2017 წლამდე იყო ნინოწმინდის მუნიციპალიტეტის საკრებულოს წევრი და ხელმძღვანელობდა განათლების, სპორტის, კულტურისა და ახალგაზრდობის საქმეთა კომისიას.
2017 და 2021 წლებში ადგილობრივი თვითმმართველობის არჩევნებში ის ნინოწმინდის მუნიციპალიტეტის მერად აირჩიეს.
ანივარდ მოსოიანი სამცხე-ჯავახეთის პირველი და ერთადერთი ქალი მერია.
ბიზნესი
ღია ეკონომიკური რეესტრების მიხედვით, საქართველოში ანივარდ მოსოიანის, მისი მეუღლისა და შვილის სახელზე არანაირი ბიზნესი არ არის რეგისტრირებული.
ქონება
ანივარდ მოსოიანის მიერ 2024 წელს შევსებული დეკლარაციის მიხედვით, მის სახელზე არ არის რეგისტრირებული არც მოძრავი და არც უძრავი ქონება. დეკლარაციაში მითითებულია მეუღლისა და შვილის 2023 წლის ხელფასები, თუმცა ანივარდ მოსოიანის წლიური ხელფასი მითითებული არ არის. ხოჯაბეკსა და ნინოწმინდაში მდებარე სახლი და სასოფლო-სამეურნეო მიწის ნაკვეთი მის მეუღლეზე, სურენ მზიკიანზეა რეგისტრირებული.
აღსანიშნავია, რომ 2020 წელს ანივარდ მოსოიანი უძრავი ქონების შესახებ არასწორი ინფორმაციის მიწოდებისთვის დაჯარიმდა.
