საქართველოში ადგილობრივი თვითმმართველობის არჩევნები 2025 წლის 4 ოქტომბერს გაიმართება. პარტიამ „ქართულმა ოცნებამ“ მოქმედი მერი მელკონ მაკარიანი ახალქალაქის მუნიციპალიტეტის მერობის კანდიდატად მეორედ წარადგინა, ისევე როგორც 2021 წლის არჩევნებში. Jnews, საჯარო მონაცემებზე დაყრდნობით, კანდიდატის, მისი პოლიტიკური კარიერისა და აქტივების შესახებ ინფორმაციას აქვეყნებს.
ბიოგრაფია
მელკონ მაკარიანი დაიბადა 1986 წელს ახალქალაქის მუნიციპალიტეტის სოფელ ბარალეთში. 2004 წელს დაამთავრა სოფლის საშუალო სკოლა და ჩააბარა სამცხე-ჯავახეთის უნივერსიტეტის იურიდიულ ფაკულტეტზე. სამი წლის შემდეგ მან სწავლა მიატოვა და ჩააბარა გიუმრის „პროგრესის“ უნივერსიტეტში, რომელიც 2012 წელს დაამთავრა. დაოჯახებულია, ჰყავს ორი ვაჟი და ერთი ქალიშვილი.
პოლიტიკური აქტივობა
მაკარიანმა პოლიტიკური კარიერა 2013 წელს დაიწყო პარტია „ქართულ ოცნება – დემოკრატიული საქართველოს“ შემადგენლობაში, ხოლო საპრეზიდენტო არჩევნების დროს ხელმძღვანელობდა პარტიის ახალგაზრდულ ჯგუფს.
2014 წლის ადგილობრივი თვითმმართველობის არჩევნებში ის ახალქალაქის მუნიციპალიტეტის საკრებულოში აირჩიეს არასაპარლამენტო ოპოზიციის (კახა კუკავა და ფიქრია ჩიხრაძე) სიით და ხელმძღვანელობდა ფრაქციას „თავისუფალი საქართველო“.
2017 წელს ის ხელახლა აირჩიეს საკრებულოში, ამჯერად პარტია „ქართული ოცნება – დემოკრატიული საქართველოდან“ და ხელმძღვანელობდა ტერიტორიული დაგეგმარებისა და ინფრასტრუქტურის კომიტეტს. 2020 წლის საპარლამენტო არჩევნების დროს ის იყო „ქართული ოცნების“ პარტიის შტაბის უფროსის მოადგილე ახალქალაქში. 2021 წელს იგი იმავე პარტიით აირჩიეს ახალქალაქის მერად.
ბიზნესი
ღია ეკონომიკური რეესტრების მიხედვით, მელკონ მაკარიანის სახელზე ბიზნესი არ არის რეგისტრირებული. ის სოფლის მეურნეობით არის დაკავებული.
ქონება
2014 წლიდან 2024 წლამდე მელკონ მაკარიანი ყოველწლიურ დეკლარაციებს აქვეყნებდა „თანამდებობის პირთა ქონებრივი მდგომარეობის ელექტრონული სისტემის“ ვებპორტალზე.
ამ მონაცემების თანახმად, 2017 წლიდან მელკონ მაკარიანი, ვარუჟან, მჰერ და იერასხ მაკარიანებთან ერთად, 10,370 კვ.მ. სასოფლო-სამეურნეო მიწის თანამფლობელია.
2015 წელს მან 6,000 დოლარად შეიძინა Ford-ის მარკის სატვირთო მანქანა, ხოლო 2020 წელს 10,000 დოლარად მსუბუქი ავტომობილი.
მონაცემთა ბაზა ასევე აჩვენებს, რომ მაკარიანმა 2023 წელს 53,133.36 ლარის ხელფასი მიიღო. მისი მეუღლე, პერჩანუშ ევაჯიანი, საბავშვო ბაღში მასწავლებლად მუშაობს.
