2024 წელს სისტემაში გაშვებული წყლის 67% „დაიკარგა“. ამის შესახებ სტატისტიკის ეროვნული სამსახურის მიერ გამოქვეყნებული მონაცემებიდან ირკვევა, წერს bpn.ge.
კერძოდ, „საქსტატის“ ცნობით, გასულ წელს წყალმომმარაგებელმა საწარმოებმა სისტემაში 868.5 მლნ კუბური მეტრი წყალი გაუშვეს, საიდანაც აბონენტებს 286.6 მლნ კუბური მეტრი მოცულობა მიეწოდა, 581.9 მლნ კუბური მეტრი კი ტრანსპორტირებისას დაიკარგა.
აღსანიშნავია, რომ ყველაზე დიდი მოცულობის წყალი ბოლო ხუთი წლის განმავლობაში სისტემაში 2021 წელს გაეშვა და დანაკარგიც ყველაზე მაღალი იყო. 2021 წლის შემდეგ კი სისტემაში გაშვებული წყლის მოცულობაც და შესაბამისად, დანაკარგებიც იკლებს.
საქართველოში სისტემაში გაშვებული წყლის 60-70% „იკარგება“
უფრო კონკრეტულად, 2020-2024 წლებში სისტემაში გაშვებული წყლის მოცულობა, დანაკარგები და დანაკარგების პროცენტული წილი ასე გამოიყურება:
2020 წელი – გაშვებული წყლის 64.7% დაიკარგა (სისტემაში გაეშვა – 760.1 მ3, დაიკარგა – 491.6 მ3);
2021 წელი – გაშვებული წყლის 72.8% დაიკარგა (სისტემაში გაეშვა – 931.5 მ3, დაიკარგა – 677.9 მ3);
2022 წელი – გაშვებული წყლის 71.7% დაიკარგა (სისტემაში გაეშვა – 890.2 მ3, დაიკარგა – 638.5 მ3);
2023 წელი – გაშვებული წყლის 68.3% დაიკარგა(სისტემაში გაეშვა – 874.6 მ3, დაიკარგა – 597.1 მ3);
2024 წელი – გაშვებული წყლის 67% დაიკარგა (სისტემაში გაეშვა – 868.5 მ3, დაიკარგა – 581.9 მ3).
ცნობისთვის, ტრანსპორტირებისას დანაკარგები მოიცავს ავარიების, გაჟონვის, აორთქლებისა და წყალმზომის შეცდომის გამო სისტემაში გაშვებული წყლის დანაკარგებს.
