როდესაც საქმე განათლებაზე წვდომას, საზღვრების გაუქმებასა და ახალი აზროვნების ჩამოყალიბებას ეხება, ხშირად ახსენებენ Erasmus+ პროგრამას, რომლის მეშვეობითაც ბევრი ახალგაზრდა ახერხებს თავისი ოცნებების ასრულებას, მოგზაურობას და განათლების მიღებას. მაგრამ რა მოხდება, თუ ეს შესაძლებლობა შეჩერდება? Jnews-მა ესაუბრა ახალგაზრდებს, რომლებმაც საკუთარი გამოცდილება და მოსაზრებები გაუზიარეს.
ასია სირაკანიანი ნინოწმინდის რაიონის სოფელ განძიდანაა. გოგონა, რომელმაც ცოტა ხნის წინ დაამთავრა თბილისის სახელმწიფო უნივერსიტეტი, პროფესიით ინგლისური ენის ფილოლოგი და მასწავლებელია და Erasmus+ პროგრამას მისი პროფესიული განვითარების ერთ-ერთ მნიშვნელოვან ეტაპად მიიჩნევს.
„Erasmus+-მა დიდი როლი ითამაშა ჩემს ცხოვრებაში. მან დამეხმარა უფრო თავდაჯერებული გავმხდარიყავი, მესწავლა მულტიკულტურულ გუნდში მუშაობა და ლიდერობისა და კომუნიკაციის უნარები. ეს პროგრამები შესანიშნავი შესაძლებლობებია არა მხოლოდ სწავლისთვის, არამედ კომუნიკაციისთვის, კულტურული გაცვლისა და პიროვნული განვითარებისთვისაც“, – ამბობს ასია.
ის ამბობს, რომ Erasmus+ პროგრამების შესახებ რამდენიმე წლის წინ შეიტყო. თავიდან მხოლოდ თეორიული ცოდნა ჰქონდა, მაგრამ როდესაც საბოლოოდ მიიღო მონაწილეობა თავის პირველ პროგრამაში, მიხვდა, თუ რამხელა გავლენა შეიძლება ჰქონდეს ასეთ გამოცდილებას.
ის ყოველთვის ეძებდა ახალ პლატფორმებსა და გამოცდილებას, რაც მას პროფესიონალურად განვითარებაში დაეხმარებოდა. ცოტა ხნის წინ მან მონაწილეობა მიიღო სომხეთში ორგანიზებულ საერთაშორისო ტრენინგში, რომელიც საზოგადოების სოციალურ ინიციატივებს ეძღვნებოდა. ასიას თქმით, ასეთი გამოცდილება აუცილებელია, განსაკუთრებით მომავალი პედაგოგისთვის.
ჩვენი გმირი ირწმუნება, რომ Erasmus+ პროგრამა ახალგაზრდებისთვის ძალიან ღირებულია. ის მათ აძლევს შესაძლებლობას, დამკვიდრდნენ, გაეცნონ ახალ კულტურებს, აღმოაჩინონ ახალი ქვეყნები და განივითარონ საგანმანათლებლო და პროფესიული უნარები.
„თუ ეს პროგრამა არ იარსებებს, ეს ნიშნავს უკან გადადგმულ ნაბიჯს, ჩაკეტილობის, შეზღუდული შესაძლებლობებისა და საგანმანათლებლო იზოლაციისკენ“, – აღნიშნავს ასია.
ასიას აზრს იზიარებს ახალქალაქის მუნიციპალიტეტის სოფელ კულიკამიდან ჟანა ჩოგანდარიანიც, რომელიც ასევე მონაწილეობდა სხვადასხვა არასამთავრობო ორგანიზაციის მიერ ორგანიზებულ პროგრამებში, რომლებიც Erasmus+-ის მიერ იყო დაფინანსებული.
„სკოლიდან მოყოლებული ძალიან მინდოდა სხვა ქვეყანაში წასვლა, რაღაც ახალი მენახა და მესწავლა და უკვე სტუდენტობის წლებში ვცდილობდი მონაწილეობა მიმეღო და ბავშვობის ერთ-ერთი ოცნება ამესრულებინა“, – ამბობს ის.
ჟანა Erasmus+ პროგრამის ფარგლებში რამდენიმე ქვეყანაში იყო ნამყოფი: უნგრეთი, გერმანია, ჩეხეთი, რუმინეთი, თურქეთი და ბულგარეთი. ის გვარწმუნებს, რომ ნებისმიერმა ახალგაზრდამ აუცილებლად უნდა მიიღოს მონაწილეობა ასეთ პროგრამებში, გაიცნოს საზღვარგარეთ მცხოვრები სხვა ადამიანები და გაუზიაროს თავისი ქვეყნის კულტურა.
„ეს არის პროგრამა, რომელსაც არანაირი უარყოფითი მხარე არ აქვს, ადამიანს მხოლოდ სურვილი სჭირდება. მე ბევრი ქვეყნის ახალგაზრდები გავიცანი, დავახლოვდით ერთმანეთს და პროგრამის გარდა, ყოველთვის ვურთიერთობთ და მათ საქართველოში ვეპატიჟებით. ძალიან მნიშვნელოვანია, გყავდეს მეგობრები სხვადასხვა ადგილიდან, რომლებთანაც განვითარდები და შეგიძლია თბილი და გულწრფელი მეგობრობა დაამყარო“, – ამბობს ჟანა ჩოგანდარიანი.
ჟანა გვარწმუნებს, რომ თუ პროგრამა საქართველოში არ იმუშავებს, ახალგაზრდები ბევრს დაკარგავენ.
ინფორმაციისთვის, Erasmus+ არის ევროკავშირის უდიდესი პროგრამა განათლების, ახალგაზრდობისა და სპორტის სფეროებში. პროგრამის ბიუჯეტი 2021-2027 წლებისთვის 26 მილიარდ ევროზე მეტია, რომელიც მიზნად ისახავს სოციალურ ინკლუზიას, მწვანე და ციფრულ ტრანსფორმაციებს, ასევე ახალგაზრდების ჩართულობას.
პროგრამა უზრუნველყოფს მობილობისა და საერთაშორისო თანამშრომლობის პლატფორმას, რომელშიც მონაწილეობენ როგორც სტუდენტები და ახალგაზრდები, ასევე საგანმანათლებლო დაწესებულებები და ორგანიზაციები. საქართველოში ის განსაკუთრებით პოპულარულია რეგიონების ახალგაზრდებში, სადაც ის ხშირად ხდება საგანმანათლებლო და პროფესიული წინსვლის უნიკალური გზა.
თუ პროგრამა შეწყდება, ყველაზე დაუცველი რეგიონების ახალგაზრდები იქნებიან. ისინი, ვისთვისაც ეს პროექტები არა მხოლოდ განათლებაა, არამედ მსოფლმხედველობის, თავდაჯერებულობისა და აქტიური მოქალაქეობის მამოძრავებელი ძალის ღია კარიც.
Erasmus+-ის შეწყვეტა საერთაშორისო ქსელიდან გასვლას ნიშნავს, რამაც, თავის მხრივ, შეიძლება სერიოზული საგანმანათლებლო იზოლაცია გამოიწვიოს.
ახალგაზრდები იმედოვნებენ, რომ პროგრამა საქართველოში გაგრძელდება და მსოფლიოსკენ მიმავალი შესაძლებლობების კარებს ღიად შეინარჩუნებს.
Erasmus+ გთავაზობთ მობილობისა და თანამშრომლობის შესაძლებლობებს შემდეგ სფეროებში:
