წლევანდელი „მის სომხეთის“ ეროვნული სილამაზის კონკურსის გამარჯვებული წარმოშობით ჯავახეთის სოფელ ზაკიდანაა. 20 წლის ანუშ აღაბალიანმა, რომელიც თბილისის სახელმწიფო უნივერსიტეტში სწავლობს, არა მხოლოდ დაამტკიცა, რომ ოცნებები ახდება, არამედ ბევრი ახალგაზრდა გოგონასთვის შთამაგონებელი მაგალითიც გახდა.
ანუში ივანე ჯავახიშვილის სახელობის თბილისის სახელმწიფო უნივერსიტეტის ინგლისური და ლათინური ლინგვისტიკის ფაკულტეტზე სწავლობს და ასევე მღერის თბილისის კათოლიკურ ეკლესიაში. ჩვენი გმირი აქტიურად ეწევა სტუდენტურ ცხოვრებას თბილისში და მშობლიურ სოფელში ყოფნისას მიწათმოქმედებით, ტანვარჯიშითა და ხატვით არის დაკავებული.
მისი გზა „მის სომხეთის“ კონკურსამდე მარტივი არ ყოფილა. 2023 წელს მან შეავსო განაცხადი და მალევე მიიღო პირველი მოწვევა ერევანში. მისი თქმით, ამ მომენტიდან დაიწყო დაახლოებით ორწლიანი მოგზაურობა, სავსე გამოწვევებით, კურსირებით, დისციპლინებითა და გადაღებებით.
„2 წლის განმავლობაში ყოველთვიურად დავდიოდი თბილისიდან ერევანში კურსებსა და გადაღებებზე, რაც ძალიან რთული იყო უნივერსიტეტის ლექციებთან შეთავსება. მაგრამ მაინც გადავწყვიტე, ერთდროულად მიმეღწია ჩემი ორი მიზნისთვის: სწავლისა და სილამაზის კონკურსისთვის“, – გვიყვება ანუში საუბარში.
ბავშვობიდან ოცნებობდა ამ ყველაფერზე, უყურებდა „მის სამყაროს“ კონკურსს და იმედოვნებდა, რომ ერთ დღეს დიდ სცენაზე მიაღწევდა. ოცნება მიზნებად იქცა, მიზნები კი – სამსახური, სპორტი, სირბილი, თვითგანათლება. ეს ყველაფერი მას თავდაჯერებულობაში ეხმარებოდა, როგორც გონებრივად, ასევე ფიზიკურად.
„გონებრივად ძალიან მშვიდი და ბედნიერი ვიყავი, ყველაფრის მიუხედავად, გავიმარჯვებდი თუ არა, მაინც ძალიან მშვიდი ვიყავი, რაც მთელი გამოსვლის განმავლობაში მეხმარებოდა. როდესაც ჩემი სახელი გამოაცხადეს, ერთი წამითაც არ დავიჯერე, მაგრამ მაინც სიმშვიდე ვიგრძენი“.
ანუშ აღაბალიანი დღეს არა მხოლოდ სილამაზის კონკურსის გამარჯვებულია, არამედ შეუპოვრობის, თავდადებისა და ოცნებების ასრულების ძალის ნათელი მაგალითიც. მისი გზავნილი ჯავახეთის გოგონებისადმი მარტივი და ღრმაა:
„მე ვურჩევდი მათ, დაეყრდნონ საკუთარ შინაგან ხმას. თუ არსებობს მიზანი, არ გაავლონ ზღვარი საკუთარ თავსა და ამ მიზანს შორის და წინ წავიდნენ“.
