28 მაისს ახალქალაქის მუნიციპალიტეტის საკრებულოში ყველა კომიტეტის ერთობლივი სხდომა გაიმართა, სადაც განიხილეს ახალი ვიდეოჩამწერი აპარატურის შეძენისა და კამერის სერვერის მოვლა-პატრონობისთვის დაფინანსების გამოყოფის საკითხი. დისკუსიის დროს ასევე განიხილეს მოსახლეობის შეკითხვები ვიდეოჩამწერი მოწყობილობებით დაფიქსირებულ ჯარიმებთან დაკავშირებით.
ახალქალაქის მერიამ საკრებულოს მიმართა თხოვნით, გამოყოს 17 000 ლარი ვიდეოკამერების სერვერის მომსახურებისთვის და 26 000 ლარ ახალი ვიდეოკამერების შესაძენად. საერთო ჯამში, თანხა 43 000 ლარს შეადგენს.
მერიის წარმომადგენლების თქმით, კამერების განთავსება არა მხოლოდ ქალაქში, არამედ სოფლებშიც იგეგმება. ასევე მოხდება მოძველებული კამერების შეცვლა და საჭირო კაბელების შეძენა. მერიის თანამშრომლების განცხადებით, 17 000 ლარი განკუთვნილია მუნიციპალიტეტის ტერიტორიაზე საგზაო მოძრაობის წესების დარღვევების ჩამწერი კამერების მომსახურებისთვის. აღინიშნა, რომ ამ კამერების მიერ დაფიქსირებული ჯარიმები ახალქალაქის მუნიციპალიტეტის ბიუჯეტის შემოსავლების ნაწილს შეადგენს.
„გასულ წელს ვიდეოკამერებით დაფიქსირებული საგზაო მოძრაობის წესების დარღვევისთვის ჯარიმებიდან ადგილობრივ ბიუჯეტში დაახლოებით 500 000 ლარი შევიდა“, — განუცხადა დეპუტატებს ახალქალაქის მერიის საფინანსო განყოფილების უფროსმა კარენ მერგელიანმა.
კითხვაზე, მუშაობს თუ არა ვიდეოსამეთვალყურეო მოწყობილობები მუდმივად, დეპუტატებმა უპასუხეს, რომ ისინი სულ ჩართული არ არის, არამედ პერიოდულად ირთვება. ამასთან, ყოველ ჯერზე სხვადასხვა კამერა აფიქსირებს სხვადასხვა დარღვევას: ღვედის არგაკეთება, ტექნიკური დათვალიერების არარსებობა, სიჩქარის გადაჭარბება. უწყვეტი ხაზის გადაკვეთისთვის ჯარიმები ვიდეოკამერებით არ ფიქსირდება, რადგან ახალქალაქის არცერთ ქუჩაზე არ არის მონიშვნები.
როდესაც გაკეთდა კომენტარი იმის შესახებ, რომ მაცხოვრებლებს რამდენიმე თვის განმავლობაში არ მიუღიათ ჯარიმები გზების ცუდი მდგომარეობის გამო, საკრებულოს თავმჯდომარემ, ნაირი ირიციანმა განაცხადა, რომ მან ჯარიმის შეტყობინება სწორედ წინა დღეს მიიღო – ტექნიკური დათვალიერების არქონის გამო.
„როდესაც გზები ცუდ მდგომარეობაში იყო და ორმოების შეკეთება არ ხდებოდა, მაცხოვრებლები ამბობდნენ:
„ჩვენი მანქანები მწყობრიდან გამოდის, ამიტომ ტექნიკურ დათვალიერებას ვერ გავდივართ“. თუმცა, ეს ერთი მძღოლის აზრია, სხვები უბრალოდ მხარს უჭერდნენ მას. თუ ასეთი კანონი იქნება მიღებული, ის პარლამენტმა უნდა დაამტკიცოს. მსგავსი რამ არ შეიძლება მოხდეს. მაცხოვრებლებისთვის ჯარიმების შესახებ შეტყობინებების არმიღების მიზეზი ის არის, რომ კამერები პერიოდულად მუშაობს“, — განმარტა ნაირი ირიციანმა.
დეპუტატები ასევე შეთანხმდნენ, რომ ვიდეოსამეთვალყურეო მოწყობილობებისა და ჯარიმების წყალობით, შემცირდა ავტოსაგზაო შემთხვევების რიცხვი, განსაკუთრებით გზის საშიშ მონაკვეთებზე, როგორიცაა თავისუფლება-აღმაშენებლის მონაკვეთი, სადაც ხშირად ხდებოდა ავტოსაგზაო შემთხვევები, მათ შორის მსხვერპლით.
