ნინოწმინდის მუნიციპალიტეტის ტერიტორიაზე მდებარე ნაგავსაყრელი, რომელიც ახალქალაქისა და ნინოწმინდის მუნიციპალიტეტებს ემსახურება, თითქმის სამი თვეა კონსერვაციის გარეშეა დარჩენილი, რადგან ტექნიკა მწყობრიდან გამოვიდა. Jnews-ი ამის შესახებ ჯერ კიდევ აპრილის დასაწყისში წერდა, თუმცა მას შემდეგ ვითარება არ შეცვლილა.
4 აპრილს გადაღებული ნაგავსაყრელის ფოტო
ფოტო გადაღებულია 20 მაისს
აპრილის დასაწყისში Jnews-მა ნაგავსაყრელზე არსებულ ანტისანიტარულ მდგომარეობაზე შემდეგი სტატია გამოაქვეყნა-ახალქალაქი-ნინოწმინდის გზის მიმდებარედ ნაგავსაყრელზე ერთი თვეა კონსერვაციის სამუშაოები არ ჩატარებულა. მაშინ ახალციხის „მყარი ნარჩენების მართვის კომპანია“ შპს-ში, რომელიც ამ ნაგავსაყრელს განაგებს, განაცხადეს, რომ ეს თითქოს არ ეხებოდა ახალქალაქს, რადგან ნაგავსაყრელი ნინოწმინდის მუნიციპალიტეტის ტერიტორიაზე მდებარეობს.
დღეს, 20 მაისს, ჩვენ ისევ ვესტუმრეთ ადგილს, პოზიტიური ცვლილებების იმედით.
დაცვის თანამშრომელმა არ მოგვცა შიგნით შესვლისა და ტერიტორიის გადაღების უფლება, მაგრამ გარედან მაინც გადავიღეთ ფოტოები. სამწუხაროდ, ვითარება უცვლელი დარჩა.
დაბლა მოჩანდა მომუშავე პატარა ტრაქტორი, დიდი კი უძრავად იდგა. დაცვის თანამშრომლის თქმით, დიდი ტრაქტორის ძრავა გაფუჭებულია, მაგრამ უახლოეს დღეებში უნდა მოიტანონ. ამის შემდეგ, როგორც ის ამტკიცებს, დაიწყება კონსერვაციის სამუშაოები.
პოტო გადაღებულია 4 აპრილს
ფოტო გადაღებულია 20 მაისს
ნაგავსაყრელის ირგვლივ ანტისანიტარია და მძაფრი უსიამოვნო სუნია. ბოლო 10 წლის განმავლობაში ნაგავსაყრელის ტერიტორია გაორმაგდა ან გასამმაგდა. მიუხედავად იმისა, რომ ტერიტორიის ნაწილი შემოღობილი იყო, ახალ ნაკვეთებზე ღობე არ არის. ქარს ცელოფნის პარკები და სხვა ნაგავი მიმდებარე მინდვრებსა და საძოვრებზე გადააქვს.
ღობის მიღმა მაშინვე კარტოფილის ყანებია. მათი მეპატრონეები არაერთხელ ჩიოდნენ, რომ ცელოფანი მათ ნაკვეთებზე ხვდება. გარდა ამისა, პარკები საფრთხეს უქმნის პირუტყვს – ცხოველებს შეუძლიათ მათი ჭამა.
პრობლემა სასწრაფო მოგვარებას საჭიროებს, რადგან სიტუაცია კვლავ გაუარესდება, რაც საფრთხეს უქმნის გარემოსა და ადგილობრივი მოსახლეობის ჯანმრთელობას.
