უცხოელთა და მოქალაქეობის არმქონე პირთა საერთაშორისო დაცვის წესების გაუმჯობესების, არალეგალური მიგრაციის წინააღმდეგ ბრძოლისა და თავშესაფრის პროცედურების ბოროტად გამოყენების თავიდან ასაცილებლად, საქართველოს შინაგან საქმეთა სამინისტრომ მოამზადა საკანონმდებლო ცვლილებების პაკეტი „საერთაშორისო დაცვის შესახებ“. ამის შესახებ შსს-ს განცხადებაშია ნათქვამი.
როგორც განცხადებაშია აღნიშნული, ცვლილებების პაკეტი საკანონმდებლო ორგანოს განსახილველად წარედგინა.
როგორც სააგენტო განმარტავს, აღნიშნული საკანონმდებლო ცვლილებების პაკეტი მომზადებულია ევროპის პარლამენტისა და საბჭოს დირექტივების შესაბამისად.
ცვლილებების მიხედვით:
სისხლის სამართლის კოდექსს ემატება სასჯელის ახალი სახე: უცხოელის საქართველოდან გაძევება და საქართველოში შემოსვლის აკრძალვა განსაზღვრული ვადით;
ადმინისტრაციულ სამართალდარღვევათა კოდექსს დაემატა ადმინისტრაციული სასჯელის ახალი სახე: უცხოელის საქართველოდან გაძევება და უცხოელის საქართველოში შემოსვლის აკრძალვა.
საქართველოში ყოფნის წესების დამრღვევი უცხოელებისთვის ჯარიმები იზრდება.
მნიშვნელოვნად გამარტივდა ქვეყანაში არალეგალურად მცხოვრები უცხოელთა დეპორტაციის პროცედურა.
თავშესაფრის პროცედურების ბოროტად გამოყენების თავიდან ასაცილებლად:
შეჰყავთ თავშესაფრის მინიჭების განცხადებების დაჩქარებული განხილვის პროცედურა იმ უცხოელი პირებისთვის, რომლებმაც ქვეყნის ტერიტორიაზე შესვლიდან ერთი თვის ვადაში არ შეიტანეს თავშესაფრის მოთხოვნის განაცხადი.
ინერგება ახალი მექანიზმი, რომლის მიხედვითაც, თავშესაფრის მინიჭების საკითხი განიხილება საქართველოს სახელმწიფო საზღვარზე უცხოელის საქართველოს ტერიტორიაზე შეშვების გარეშე, თუ ქვეყანაში უცხოელის შემოსვლა საფრთხეს უქმნის სახელმწიფო უსაფრთხოებას.
მნიშვნელოვნად შემცირდა თავშესაფრის განცხადების განხილვისა და გასაჩივრების ვადები.
ინერგება გადაწყვეტილების წარდგენის გამარტივებული (ელექტრონული) პროცედურა, რაც მნიშვნელოვნად გაამარტივებს გასაჩივრების ვადების კონტროლს.
„ინფორმაციის მიხედვით, საქართველოში ბინადრობის ნებართვის გაცემაზე შეიზღუდებათ იმ უცხოელებს, რომელთა მიმართაც მიმდინარეობს გაძევების საკითხის განხილვა ან უკვე მიღებულია გადაწყვეტილება მათ საქართველოდან გაძევებასთან დაკავშირებით.“
