---

საქართველოში რძის იმპორტი თითქმის გაორმაგდა. კერძოდ, 2025 წლის იანვარ-თებერვალში იმპორტი წლის ჭრილში 93%-ით გაიზარდა.

საქართველოს ეროვნული სტატისტიკური სამსახურის მონაცემებით, 2025 წლის იანვარ-თებერვალში ქვეყანაში 3,42 მილიონ დოლარზე მეტი ღირებულების 3448 ტონა რძე შემოვიდა.გასულ წლელთან შედარებით ანალოგიურ პერიოდში 2,14 მილიონი დოლარის ღირებულების 1786 ტონა რძე შემოვიდა.

გასულ წელს 1 ლიტრის იმპორტის საშუალო ფასი საანგარიშო პერიოდში 1,2 დოლარი იყო, ხოლო 2025 წლის პირველ ორ თვეში – 99 ცენტი. მონაცემები აჩვენებს, რომ იმპორტის ფასი 17,5%-ით შემცირდა.

ასევე აღსანიშნავია, რომ მიმდინარე წელს, საანგარიშო პერიოდში, საქართველოში რძის ყველაზე დიდი მოცულობა აზერბაიჯანიდან შემოვიდა. ამ პერიოდში აზერბაიჯანის წილმა რძის მთლიან იმპორტში თითქმის 60% შეადგინა.

კერძოდ, 2025 წლის იანვარ-თებერვალში ყველაზე დიდი მოცულობის რძე შემდეგ 5 ქვეყანისგან შევიძინეთ:

• აზერბაიჯანი – 2053 ტონა, 1,78 მილიონი აშშ დოლარი (საშუალო ფასი 87 ცენტი ლიტრზე);
• პოლონეთი – 474 ტონა, 460 ათასი დოლარი (საშუალო ფასი 97 ცენტი ლიტრზე);
• ბელარუსი – 245 ტონა, 202 ათასი დოლარი (საშუალო ფასი 82 ცენტი ლიტრზე);
• თურქეთი – 180 ტონა, 168 ათასი დოლარი (საშუალო ფასი 93 ცენტი ლიტრზე);
• რუსეთი – 144 ტონა, 244 ათასი დოლარი (საშუალო ფასი 1,69 დოლარი ლიტრზე).