3-4 აპრილს ახალციხეში ორდღიანი ვიზიტით იმყოფებოდა საქართველოში ევროკავშირის ელჩი პაველ ჰერჩინსკი. ის შეხვდა რეგიონის არასამთავრობო ორგანიზაციებისა და მედიის წარმომადგენლებს, ასევე გახსნა ევროკავშირის ახალი საინფორმაციო პუნქტი ახალციხეში.
ელჩის ორდღიანი ვიზიტი მოიცავდა ურთიერთობას სამოქალაქო საზოგადოებასთან, ახალგაზრდებთან, მეწარმეებთან და სხვა ბენეფიციარებთან, რომლებსაც ევროკავშირი უჭერს მხარს.
გუშინ, 3 აპრილს ელჩი ეწვია არასამთავრობო ორგანიზაციების „ტოლერანტული ასოციაციის“, არასამთავრობო ორგანიზაცია „გენდერული თანასწორობა საქართველოსთვის“, საცხობი „მანიას“ წარმომადგენლებს და ა.შ.
დღეს, 4 აპრილის დილით ევროკავშირის ელჩმა საქართველოში, პაველ ჰერჩინსკიმ, ოფიციალურად გახსნა ევროკავშირის ახალი საინფორმაციო პუნქტი ახალციხეში – სივრცე, რომელიც მიზნად ისახავს ევროკავშირის დაახლოებას სამცხე-ჯავახეთის რეგიონის თემთან.
„მინდა დავადასტურო ევროპის კავშირის ერთგულება საქართველოს ყველა რეგიონში სამოქალაქო საზოგადოების ინიციატივების გაძლიერებისადმი“, – განაცხადა ელჩმა. მან ასევე დაამატა, რომ დაიწყეს საქართველოს რეგიონებში აქტიური ვიზიტი, რათა უკეთ გაეცნონ თბილისის გარეთ არსებულ ვითარებას.
ახალციხის საინფორმაციო პუნქტი ევროკავშირმა პროექტ “REAKT for Georgia”-ს მხარდაჭერით შექმნა. “REAKT for Georgia”-ს ახორციელებს კონრად ადენაუერის ფონდი და მესხ დემოკრატთა კავშირი (სმდკ). საინფორმაციო პუნქტი წარმოადგენს პლატფორმას ადგილობრივი სამოქალაქო საზოგადოებისთვის, ახალგაზრდებისა და მასმედიისთვის, რომელიც ხელს შეუწყობს ადგილობრივი მოსახლეობის ჩართულობის დონის ამაღლებას ევროკავშირთან დაკავშირებულ თემებში, სანდო ინფორმაციის მიღებასა და საზოგადოებრივ ცხოვრებაში აქტიურ მონაწილეობას.
საინფორმაციო პუნქტის გახსნის შემდეგ, ევროკავშირის ელჩი საქართველოში შეხვდა ახალციხის, ახალქალაქისა და ნინოწმინდის არასამთავრობო ორგანიზაციებსა და მედიას. შეხვედრაზე ორგანიზაციები იზიარებდნენ ინფორმაციას თავიანთი საქმიანობის, მუშაობის პროცესში არსებული გამოწვევებისა და სირთულეების, ასევე სამომავლო მოლოდინების შესახებ.
რეგიონის სამოქალაქო საზოგადოებასთან შეხვედრის შემდეგ, ელჩი ასევე ეწვია რაბათის ციხეს.
პაველ ჰერჩინსკი ევროკავშირის წარმომადგენლობის ხელმძღვანელის პოსტზე საქართველოში 2022 წელს დაინიშნა. ეს მისი პირველი ვიზიტია რეგიონში თავის თანამდებობაზე ყოფნის პერიოდში.
