პატიმრების გასათავისუფლებლად პოლიტპატიმართა ოჯახები ქმნიან საზოგადოებრივ მოძრაობას – ოთხ კედელში დაპატიმრებული ახალგაზრდების ახლობლებმა რუსთაველის გამზირზე წინააღმდეგობის მოძრაობის დაწყება ოფიციალურად გამოაცხადეს.
მათი თქმით, ახალი სოციალური მოძრაობის მიზანია, გადადგას აუცილებელი ნაბიჯები რეჟიმის პატიმრების დაუყოვნებლივ გათავისუფლებისთვის.
8 აპრილს ისინი პარლამენტთან შეიკრიბებიან 24-საათიანი საპროტესტო აქციის დასაწყებად და ღამის გასათევად რუსთაველზე.
„გთხოვთ, შეუერთდით ჩვენს ბრძოლას ჩვენი ქვეყნის მომავლის დასაცავად. 8 აპრილს მემორიალთან შევიკრიბებით და ერთად გავათევთ ღამეს“, – აცხადებენ პატიმრების ახლობლები.
„ჩვენი შვილები, დები და მეგობრები სინდისის პატიმრები არიან. ისინი დააპატიმრეს მხოლოდ იმიტომ, რომ მშვიდობიანი გზით აპროტესტებდნენ ხელისუფლების უკანონო ქმედებებს, არჩევნების გაყალბებას, დემოკრატიული პრინციპების თელვას და ქვეყნის პროდასავლური კურსის უარყოფას. მათი დაკავება არის პოლიტიკური რეპრესიის ნაწილი, რომლის მიზანია თავისუფალი საზოგადოების დაშინება.
ჩვენ, სინდისის პატიმრების მშობლები და ახლობლები, ვქმნით საზოგადოებრივ მოძრაობას მათი გათავისუფლებისთვის და ვაცხადებთ შემდეგს:
გვინდა დავიწყოთ იმით, რომ 2008 წლის აგვისტოს ომი რუსეთმა დაიწყო, აფხაზეთი და სამაჩაბლო- საქართველოა. მადლობას ვუხდით საქართველოს ყველა ჯარისკაცს, გენერალს და შეიარაღებულ ძალებს ჩვენი ქვეყნის და მისი სულისკვეთების დაცვაში შეტანილი წვლილისთვის. ჩვენ ქედს ვიხრით თქვენი თავდადებისა და ბრძოლის წინაშე.
შესაბამისად, არავის მივცემთ უფლებას თქვენი სულისკვეთება და პატრიოტიზმი ეჭვქვეშ დააყენოს“, – აცხადებენ პატიმრების ახლობლები.
