აშშ-ის სახელმწიფო დეპარტამენტმა პირველად გააკეთა კომენტარი საქართველოში დონალდ ტრამპის თეთრ სახლში დაბრუნების შემდეგ – ახალმა ადმინისტრაციამ შეინარჩუნა კრიტიკული ტონი ქართული ოცნების მთავრობის მიმართ და განაგრძო მისი წინამორბედების ხაზი.
„შეერთებულმა შტატებმა ნათლად აჩვენა ის ნაბიჯები, რომლებიც საქართველოს მთავრობას შეუძლია გადადგას ვაშინგტონთან ურთიერთობების გაუმჯობესების საკითხში თავისი სერიოზულობის დემონსტრირებისთვის“, – ნათქვამია სახელმწიფო დეპარტამენტის განცხადებაში.
ამ ინფორმაციას გამოცემა globalnews.ge ავრცელებს. 28 მარტს მისმა ჟურნალისტმა რუსა შელიამ ბრიფინგზე საქართველოს შესახებ შეკითხვა დაუსვა სახელმწიფო დეპარტამენტის პრესმდივანს ტამი ბრიუსს. თუმცა, მაშინ არანაირი რეაგირება არ ყოფილა.
„მსურს ამ კითხვაზე პასუხის გაცემა და ჩვენ ჩავწერთ მას და მოგვიანებით დავუბრუნდებით“, – თქვა მაშინ ტამი ბრიუსმა.
2025 წლის 2 აპრილს, გამოცემამ გამოაქვეყნა სახელმწიფო დეპარტამენტის წერილობითი პასუხი.
„რაც შეეხება „ქართული ოცნების“ მთავრობის მიმდინარე ანტიდემოკრატიულ ქმედებებს – როგორც მიუნხენში აღნიშნა ვიცე-პრეზიდენტმა [ჯეი დი] ვენსმა, დემოკრატიული მანდატის მოპოვება შეუძლებელია ოპონენტების ცენზურით ან მათი დაპატიმრებით. ასევე, შეუძლებელია მისი მიღება იმ ძირითადი ელექტორატის მოსაზრებების უგულებელყოფით, რომლებიც განსაზღვრავენ, ვინ უნდა იყოს ჩვენი საერთო საზოგადოების ნაწილი,“ – აღნიშნულია უწყების განცხადებაში.
„აშშ 33 წელია საქართველოსა და ქართველი ხალხის პარტნიორია, რომელიც თანმიმდევრულად უჭერს მხარს ქვეყნის დამოუკიდებლობას, სუვერენიტეტსა და ტერიტორიულ მთლიანობას“, – ნათქვამია დოკუმენტში.
„ჩვენ გავაგრძელებთ საქართველოს მიმართ ჩვენი პოლიტიკის შეფასებას ამერიკის ინტერესების წინსვლის მიზნით“, – დაამატა სახელმწიფო დეპარტამენტმა.
ჟურნალისტმა რუსა შელიამ ბრიფინგზე შემდეგი კითხვა დასვა:
„გქონდათ თუ არა კონტაქტი საქართველოს მმართველ პარტიასთან? თუ კი, შეგიძლიათ განუმარტოთ, რა სახის დიალოგი იყო ეს? როგორც მოგეხსენებათ, ქვეყანაში უკიდურესად მძიმე ვითარებაა: ქართველი ხალხი და საერთაშორისო საზოგადოება არ აღიარებენ არჩევნების შედეგებს, მშვიდობიანი დემონსტრანტები დაპატიმრებულნი არიან, ხოლო ციხეში იმყოფება დამოუკიდებელი ჟურნალისტი. ამ გარემოებების გათვალისწინებით, როგორ აფასებს სახელმწიფო დეპარტამენტი საქართველოში მიმდინარე მოვლენებს?“
შეგახსენებთ, რომ მანამდე აშშ-ის ელჩმა საქართველოში რობინ დანიგანმა შეხვედრები გამართა საქართველოს ხელისუფლების წარმომადგენლებთან – საგარეო საქმეთა და ეკონომიკის სამინისტროს ხელმძღვანელებთან.
