2025 წლიდან ქვეყანაში გარკვეული ცვლილებები უკვე განხორციელდა. გაიზარდა საჯარო მოხელეების ხელფასები და პენსიები, ცვლილებები შევიდა სესხების გაცემის წესში და ა.შ. მთელი რიგი ცვლილებები 1 აპრილიდან ამოქმედდება.
2025 წლის 1 აპრილიდან საქართველოში სიგარეტი მხოლოდ სადა შეფუთვით გაიყიდება.
რეგულაცია ერთჯერადი სიგარეტის შეფუთვაზე ამოქმედდა 2024 წლის 1 ოქტომბრიდან. ეს ნიშნავს, რომ სიგარეტის ყველა კოლოფს უნდა ჰქონდეს ერთნაირი, ჩვეულებრივი შეფუთვა. თუმცა, აღსანიშნავია, რომ კომპანიებს მიეცათ გარდამავალი პერიოდი და ჰქონდათ 2025 წლის 1 აპრილამდე პროდუქციის თაროებიდან გაყიდვის უფლება.
დღეიდან სიგარეტის ყველა შეფუთვა ერთნაირი იქნება. თამბაქოს ნაწარმის სტანდარტიზებული შეფუთვის გარეშე რეალიზაცია, თამბაქოს ნაწარმისა და მათი შეფუთვის სტანდარტიზაციის წესის დარღვევით, 5000 ლარის ოდენობით ჯარიმას ითვალისწინებს.
პიროტექნიკის გამოყენების წესების დარღვევისთვის ჯარიმები 2025 წლის 1 აპრილიდან ამოქმედდება.
პიროტექნიკური ნაწარმის გამოყენების წესის დარღვევისთვის ჯარიმები 1 აპრილიდან ამოქმედდება. კერძოდ, პიროტექნიკური ნაწარმის მიყიდვა იმ პირზე, რომელსაც არ აქვს მისი ფლობის ან/და გამოყენების უფლება, გამოიწვევს დაჯარიმებას 2000 ლარის ოდენობით. ამასთან, პიროტექნიკური ნაწარმის შეძენა იმ პირის მიერ, რომელსაც ამის უფლება არ აქვს, იწვევს ჯარიმას 1000 ლარის ოდენობით. ამასთან, პიროტექნიკური ნაწარმის საქართველოს კანონმდებლობით დადგენილი წესების დარღვევით გამოყენება 2000 ლარის ოდენობით ჯარიმას იწვევს.
2025 წლის 1 აპრილიდან არასრულწლოვანთა მიერ ნომრის „112“-ის უკანონო გამოყენებისთვის დაწესდება ჯარიმა.
2025 წლის 1 აპრილიდან ადმინისტრაციული პასუხისმგებლობა ამოქმედდება ბავშვის მშობლის ან სხვა კანონიერი წარმომადგენლის მიერ არასრულწლოვნის აღზრდისა და განათლების შესახებ პასუხისმგებლობის შეუსრულებლობისთვის. ეს მოიცავს ჯარიმას არასრულწლოვნის მიერ 112 ნომრის არასანქცირებული გამოყენებისთვის.
კერძოდ, მშობლის ან ბავშვის სხვა კანონიერი წარმომადგენლის მიერ არასრულწლოვნის აღზრდისა და აღზრდის ვალდებულების შეუსრულებლობა ან მასთან დაკავშირებით სხვა ვალდებულებები, რაც გამოიხატება:მშობლის ან არასრულწლოვნის სხვა კანონიერ წარმომადგენლის მიერ აღზრდისა და განათლების, საცხოვრებლით, კვებითა და სხვა აუცილებელი პირობებით უზრუნველყოფის მოვალეობების ბოროტმოქმედებით შეუსრულებლობა, არასრულწლოვნის მიერ ექიმის დანიშნულების გარეშე ნარკოტიკული ნივთიერებების მოხმარება, არასათანადო და სასტიკი მოპყრობა ცხოველის მიმართ, მცირე ხულიგნობა, ხულიგნობა, ვანდალიზმი, ალკოჰოლური სასმელების სმა, თამბაქოს მოხმარების წესების დარღვევა, ცივი იარაღის ტარება, სქესობრივი თავისუფლებისა და ხელშეუხებლობის წინააღმდეგ სამართალდარღვევები, „112“-ის არამართლზომიერი გამოყენება, ასევე მშობლის ან არასრულწლოვნის სხვა კანონიერ წარმომადგენლის უარი არასრულწლოვანთა დახმარების ცენტრთან ხელშეკრულების დადებაზე ან დადებული ხელშეკრულებით გათვალისწინებული ვალდებულებების შეუსრულებლობა იწვევს მშობლის ან არასრულწლოვნის სხვა კანონიერ წარმომადგენლის დაჯარიმებას 100-დან 300 ლარამდე.
2025 წლის 1-ელი აპრილიდან საჯარო სამსახურის ბიუროს ლიკვიდაცია მოხდება
საჯარო სამსახურის ბიუროს ლიკვიდაცია 2025 წლის 1-ელი აპრილიდან განხორციელდება. ცნობისთვის, პარლამენტმა საჯარო სამსახურის ბიუროს ლიკვიდაციის ინიციატივას მხარი 20 თებერვალს დაუჭირა. ლიკვიდაციის შემდეგ, ბიუროს ფუნქციები და უფლებამოსილებები მთავრობის ადმინისტრაციას გადაეცემა.
