პარლამენტთან გამართულ აქციაზე რამდენიმე ადამიანი დააკავეს. დაკავებულთა შორის არის „დროას“ ხელმძღვანელი ელენე ხოშტარია, რომელიც შინაგან საქმეთა სამინისტროს ინფორმაციით, ადმინისტრაციულ პატიმრობას ექვემდებარა.
აქციის მონაწილეებმა გზის გადაკეტვა სცადეს, თუმცა ადგილზე მობილიზებულმა პოლიციამ მათ ამის საშუალება არ მისცა.
მანამდე პარლამენტთან გამართულ აქციაზე სამართალდამცავებმა ადმინისტრაციულად ორი პირი დააკავეს.
პარლამენტთან საპროტესტო აქცია შუადღეს დაიწყო, იმ დროს, როდესაც საკანონმდებლო ორგანოში საპარლამენტო საგამოძიებო კომისიის სხდომა მიმდინარეობდა. აქციის მონაწილეთა განცხადებით, პარლამენტის საგამოძიებო კომისია ქართულ არმიას განსჯის, რაც მათთვის მიუღებელია.
საქართველოს პარლამენტში მიმდინარეობდა „2003-2012 წლებში რეჟიმისა და მისი პოლიტიკური თანამდებობის პირების საქმიანობის გამოძიების დროებითი საგამოძიებო კომისიის“ სხდომა. კომისიის თავმჯდომარე „ქართული ოცნების“ წევრი არის თეა წულუკიანი. საგამოძიებო კომიტეტის გუშინდელ სხდომაზე დაიკითხნენ საქართველოს შეიარაღებული ძალების გაერთიანებული შტაბის სამშვიდობო ოპერაციების შტაბის 2008 წლის უფროსი მამუკა ღურაშვილი და 2004-2006 წლებში სახელმწიფო მინისტრი გოგა ხაინდრავა. ასევე დაიკითხა პარლამენტის თავმჯდომარის პირველი მოადგილე გია ვოლსკი, რომელიც 2004 წლიდან 2006 წლამდე საქართველოს სახელმწიფო მინისტრის მოადგილედ მუშაობდა.
