
თამბაქოს კონტროლის რეფორმის ფარგლებში საქართველოში მიმდინარე წლის 1 აპრილს ამოქმედდება კიდევ ერთი მნიშვნელოვანი რეგულაცია – თამბაქოს ნაწარმის რეალიზაცია დაიშვება მხოლოდ მარტივ, სტანდარტიზებულ შეფუთვაში“, – აცხადებენ თამბაქოს კონტროლის ალიანსში.
ალიანსის თანახმად, კანონი ყველა ბრენდს ავალდებულებს გამოიყენოს ერთიანი, სტანდარტული ფერის შეფუთვა, რომელიც აჩვენებს მხოლოდ ბრენდის და ქვეტიპის სახელს, ასევე ჯანმრთელობის გაფრთხილებებს და სხვა საჭირო ინფორმაციას.
„უბრალო შეფუთვა მიზნად ისახავს თამბაქოს ნაწარმის მიმზიდველობის შემცირებას, განსაკუთრებით მოზარდებისა და ახალგაზრდებისთვის. კვლევები აჩვენებს, რომ სტანდარტიზებული შეფუთვა ამცირებს თამბაქოს მოხმარების დაწყების ალბათობას და ხელს უწყობს მოწევის შეწყვეტას.
აღსანიშნავია, რომ ეს რეგულაცია ჯერ კიდევ 2018 წელს უნდა შესულიყო, მაგრამ თამბაქოს ინდუსტრიის ჩარევისა და ხელისუფლებაში მათი ლობისტების ზეწოლის გამო, საკანონმდებლო ცვლილებები არ მიღებულ იქნა და რეგულაციის შემოღება რამდენჯერმე გადაიდო. შეფერხების ერთ-ერთი მიზეზი ის იყო, რომ თამბაქოს ინდუსტრია მზად არ იყო ცვლილებებისთვის.ისინი ასევე მანიპულირებდნენ რუსეთ-უკრაინის ომთან დაკავშირებული სიტუაციით, მიუხედავად იმისა, რომ წარმოების პროცესი არ შეჩერებულა. სამწუხაროდ, საქართველოს პარლამენტი მუდმივად ითვალისწინებდა ინდუსტრიის მოთხოვნებს საზოგადოებრივი ჯანდაცვის ხარჯზე, უგულებელყო პროფესიული ორგანიზაციების მოწოდებები, მხარი არ დაუჭირონ დაგვიანებას და უზრუნველყონ რეგულაციის დროული განხორციელება.
თამბაქოს ნაწარმის სტანდარტიზებული შეფუთვის ძალაში შესვლა მნიშვნელოვანი ნაბიჯია საზოგადოებრივი ჯანმრთელობის დაცვისკენ. მიუხედავად შეფერხებისა და ინდუსტრიის წინააღმდეგობისა, ამ რეგულაციის განხორციელება ხელს შეუწყობს თამბაქოს მოხმარების შემცირებას და საზოგადოებრივი ჯანმრთელობის გაუმჯობესებას.
ასევე აღნიშნულია, რომ თამბაქოს კონტროლის შესახებ კანონის იმპლემენტაციის მონიტორინგის სახელმწიფო პროგრამის ფარგლებში, თებერვალში უკვე დაფიქსირდა ზოგიერთი მწარმოებლისგან სიგარეტის საცალო ქსელებში უბრალო შეფუთვაში შესვლის შემთხვევები. 1 აპრილიდან ყველა დარღვევისთვის შესაბამისი ზომები გატარდება. ჯარიმა ამ შემთხვევაში 5000 ლარია“, – ნათქვამია ინფორმაციაში.
წყარო bizzone.info