2024 წლის მეოთხე კვარტალში საქართველოს საშუალო თვიური ნომინალური ხელფასი 8.5 პროცენტით (173.0 ლარით) გაიზარდა გასული წლის შესაბამის პერიოდთან შედარებით და 2 217.5 ლარი შეადგინა. ამის შესახებ ინფორმაციას ეროვნული სტატისტიკის სამსახური ავრცელებს.
მათი მონაცემებით, შედარებით მაღალი ხელფასები დაფიქსირდა შემდეგ დარგებში:
– ინფორმაცია და კომუნიკაცია – 4008,3 ლარი (წინა წლის ანალოგიურ პერიოდთან შედარებით 7,0 პროცენტით შემცირებული);
– საფინანსო და სადაზღვევო საქმიანობა – 3 373,5 ლარი (ზრდა 8,5 პროცენტით);
– მშენებლობა – 3 361,8 ლარი (ზრდა 9,8 პროცენტით);
– პროფესიული, სამეცნიერო და ტექნიკური საქმიანობა – 3 259,1 ლარი (ზრდა 11,6 პროცენტით).
2024 წლის მეოთხე კვარტალში ქალების საშუალო ხელფასი 1 778,5 ლარი, ხოლო მამაკაცების – 2 653,8 ლარი იყო. ქალების ხელფასი წელიწადში 171,2 ლარით (10,7%) გაიზარდა, ხოლო მამაკაცების – 189,9 ლარით (7,7%). საქმიანობის ტიპების მიხედვით, ყველა სექტორში მამაკაცების ხელფასი ქალების ხელფასზე მაღალი იყო.
2024 წლის მეოთხე კვარტალში ბიზნეს-სექტორში დაქირავებულ თანამშრომელთა საშუალო თვიური ხელფასი 170,8 ლარით (7,8%) გაიზარდა და 2 367 ლარი შეადგინა. საქმიანობის ტიპების მიხედვით, ყველაზე მაღალი ხელფასი დაფიქსირდა ინფორმაციისა და კომუნიკაციების სფეროში (4 078,2 ლარი, რაც გასული წლის შესაბამის პერიოდთან შედარებით 7,7 პროცენტით შემცირდა) და პროფესიულ, სამეცნიერო და ტექნიკურ საქმიანობაში (3 663,5 ლარი, რაც 8,0 პროცენტით გაიზარდა).
2024 წლის მეოთხე კვარტალში არამეწარმეობრივ და ფინანსურ სექტორში საშუალო თვიური ხელფასი 189,7 ლარით (10,7%) გაიზარდა გასული წლის შესაბამის პერიოდთან შედარებით და 1 955,4 ლარი შეადგინა. საქმიანობის ტიპების მიხედვით, შედარებით მაღალი საშუალო ხელფასი დაფიქსირდა ფინანსური და სადაზღვევო საქმიანობის სექტორში.
„საშუალო ხელფასის ზომით რეგიონებში ლიდერობენ თბილისი და მცხეთა-მთიანეთი,“ – აღნიშნულია „საქსტატის“ ინფორმაციაში.
