ევროვიზიაზე 2025 წელს საქართველოს 22 წლის მარიამ შენგელია წარადგენს.
კონკურსში მონაწილეობის სურვილი 18 ქართველმა შემსრულებელმა გამოთქვა თავისი ნამუშევრების წარდგენით. პირველ არხს ასევე მიღებული აქვს 20-ზე მეტი უცხოელი კომპოზიტორის ნაწარმოებები.
საზოგადოებრივმა მაუწყებელმა აირჩია პროექტი, რომელიც მდიდარია ქართული მოტივებითა და ეროვნული ელემენტებით, რომელიც საუკეთესოდ წარმოაჩენს ქვეყნის კულტურულ იდენტობას საერთაშორისო კონკურსზე.
მარიამ შენგელიამ პირველ არხზე ორ პროექტში მიიღო მონაწილეობა: „საქართველოს ვარსკვლავი“ და „The Voice“.
მომღერალი ევროვიზია 2020-ზე საქართველოს წარმომადგენლის თორნიკე ღიფიანის ბექ ვოკალისტი იყო, თუმცა კონკურსი COVID-19-ის პანდემიის გამო ჩაიშალა.
„Freedom“ (თავისუფლება) სიმღერის მუსიკის ავტორი ქეთი გაბისიანია, ხოლო ტექსტი დაწერა ბუკა კარტოზიანმა.
სიმღერის ვიდეოკლიპი გადაიღო კახა ბუხრაშვილმა, სამოსის დიზაინი შეიმუშავა იზა ნადარეიშვილმა, ხოლო ვიდეოკლიპის მხატვრული გადაწყვეტა განახორციელეს შაკო პოპიაშვილმა და ნინო ძულაიანმა.
ვიდეოკლიპში მონაწილეობდნენ „ერისიონის“ სიმღერისა და ცეკვის სახელმწიფო ანსამბლის მოცეკვავეები, ასევე გია ყანჩელის სახელობის თბილისი ახალგაზრდული ორკესტრი.
„ევროვიზია 2025“ გაიმართება შვეიცარიის ქალაქ ბაზელიაში – 13, 15 და 17 მაისს.
საქართველოს წარმომადგენელი მარიამ შენგელია ევროპული აუდიტორიის წინაშე 15 მაისს, მეორე ნახევარფინალში წარდგება.
კონკურსი, ტრადიციისამებრ, პირველ არხზე პირდაპირ ეთერში გადაიცემა.
