ქართველი დიზაინერი დემნა გვასალია გახდა Gucci-ის ახალი კრეატიული დირექტორი. ამის შესახებ ინფორმაცია დიზაინერის ოფიციალურ Instagram გვერდზე „demnagram“-ზე გავრცელდა.

„ნამდვილად მოხარული ვარ, რომ შევუერთდი Gucci-ის ოჯახს. ჩემთვის დიდი პატივია წვლილი შევიტანო სახლში, რომელსაც ღრმად პატივს ვცემ და დიდი ხანია აღფრთოვანებული ვარ.

„მოუთმენლად ველოდები სტეფანოსა და მთელ გუნდთან ერთად Gucci-ის დაუჯერებელი ისტორიის შემდეგი თავის წერას,“ – ნათქვამია დემნა გვასალიას განცხადებაში.

დემნა გვასალია Balenciaga-ს კრეატიული დირექტორი 2015 წლიდან იყო. გავრცელებული ინფორმაციით, ის ზედამხედველობას გაუწევს მის ბოლო ჩვენებას 6 ივლისს, სანამ ის იტალიურ მოდის სახლში გადავა.

დემნა გვასალია დაიბადა 1981 წლის 25 მარტს სოხუმში, მოგვიანებით კი საკუთარ ქვეყანაში ლტოლვილი გახდა. რამდენიმე წლის შემდეგ მან დატოვა საქართველო და დაახლოებით 17 წლის წინ მსოფლიო აღიარება მოიპოვა.

დემნა გვასალია ბავშვობიდან დაინტერესებული იყო ხატვით და ტანსაცმლით, თუმცა ოჯახის დაჟინებული მოთხოვნით სწავლა დაიწყო თბილისის სახელმწიფო უნივერსიტეტის საერთაშორისო ეკონომიკის ფაკულტეტზე.ოთხი წლის შემდეგ ის ეკონომიკის ფაკულტეტის ასპირანტი და სტიპენდიატი გახდა. თავდაპირველად გადაწყვიტა სწავლა გაეგრძელებინა და ეკონომიკის მაგისტრის ხარისხი მიეღო, თუმცა მისი ოჯახი გერმანიაში გადასახლდა, რის შემდეგაც დემნამ ეკონომიკის მაგისტრატურის ნაცვლად ანტვერპენის ხელოვნების აკადემიაში ჩაბარება გადაწყვიტა.

ანტვერპენის სამეფო აკადემიის ხელოვნების ფაკულტეტზე ჩასაბარებლად 800 კანდიდატიდან დემნა იმ 70 სტუდენტს შორის იყო, რომლებმაც სწავლა აკადემიაში დაიწყეს.პირველი კურსის ბოლოს ის 16 ფინალისტს შორის იყო და სკოლის დამთავრების შემდეგ აკადემიის რექტორმა და დემნას პროფესორმა ვალტერ ვან ბეირენდონკმა შესთავაზა სამუშაო მისი ბრენდისთვის მამაკაცის ტანსაცმლის დიზაინერად. დემნამ იქ წელიწადნახევარი იმუშავა, რის შემდეგაც ნამუშევრები პარიზში გაგზავნა.

ახალგაზრდა ტალანტი Maison Margiela-ში მიიწვიეს. მისი ოფიციალური მოდის კარიერა სწორედ Margiela-ში დაიწყო.
დემნა არის ჩვენი დროის ერთ-ერთი ყველაზე წარმატებული დიზაინერი, რომელმაც პირველი კოლექცია Balenciaga-სთვის 2016 წლის მარტში წარადგინა. მანამდე მუშაობდა Maison Martin Margiela-ში და Louis Vuitton-ში.

სხვადასხვა წყაროს მიხედვით, ქართველი დიზაინერის ქონება 50 მილიონ დოლარად არის შეფასებული.