დღეს, 12 მარტს, ექვსი მარეგულირებელი ორგანო, რომლებიც პასუხისმგებელნი არიან მომხმარებელთა უფლებების დაცვაზე, შეხვდნენ ადგილობრივ ხელისუფლებას და სხვადასხვა დაინტერესებულ მხარეებს (IP) საინფორმაციო კამპანიის ფარგლებში, რომელიც მიეძღვნა მომხმარებელთა უფლებების მსოფლიო დღეს.
საინფორმაციო შეხვედრა ახალქალაქის მერიის სააქტო დარბაზში გაიმართა. ღონისძიებას ესწრებოდნენ: სამცხე-ჯავახეთის გუბერნატორის პირველი მოადგილე- დავით ვარდიაშვილი, ახალქალაქის მერი- მელქონ მაკარიანი, კონკურენციისა და მომხმარებელთა დაცვის სააგენტოს თავმჯდომარე-ირაკლი ლექვინაძე, დაზღვევის სახელმწიფო ზედამხედველობის სამსახურის წარმომადგენელი – დავით ონოფრიშვილი და საქართველოს ენერგეტიკის ეროვნული კომისიის წარმომადგენელი- დავით ნორმანია.
ღონისძიებათა კვირეულში ასევე მოწვეულნი არიან მარეგულირებელი ორგანოების, პარლამენტის წევრების, ცენტრალური და რეგიონული ხელისუფლების წარმომადგენლები. დამსწრეებს შორის იყვნენ საერთაშორისო ორგანიზაციების წევრები, ყრუთა და საქართველოს უსინათლოთა კავშირის, ბიზნესის, აკადემიური და არასამთავრობო სექტორის წარმომადგენლები. როგორც საინფორმაციო ბროშურებშია აღნიშნული, „ღონისძიების მიზანია საქართველოში მომხმარებელთა უფლებების დაცვის მექანიზმების გაუმჯობესება“.
შეხვედრაზე კონკურენციისა და მომხმარებელთა დაცვის სააგენტოს, საქართველოს ეროვნული ბანკის, კომუნიკაციების კომისიის, დაზღვევის სახელმწიფო ზედამხედველობის სამსახურის, სურსათის ეროვნული სააგენტოსა და ენერგეტიკის მარეგულირებელი ეროვნული კომისიის წარმომადგენლებმა ისაუბრეს. ასევე განიხილეს ახალი კერძო (ნებაყოფლობითი) საპენსიო სისტემის და სხვადასხვა სახის დაზღვევის საკითხები.
საინფორმაციო შეხვედრები გაიმართება მთელი კვირის განმავლობაში, დაწყებული თბილისში, შემდეგ ახალქალაქში, ზუგდიდსა და ბათუმში. პანელის დისკუსიის ფორმატში ექვსი მარეგულირებელი ორგანოს წარმომადგენლები დეტალურად მოუყვებიან მომხმარებლებს, როგორ დაიცვან თავიანთი უფლებები, ვის დაუკავშირდნენ მათი დარღვევის შემთხვევაში და რა ფორმით. მომხმარებელთა დაცვის ექვსი მარეგულირებლის მიერ მომზადებული პრეზენტაციები მიზნად ისახავს შშმ პირების გაძლიერებას და ინფორმაციის თანაბარი ხელმისაწვდომობის უზრუნველყოფას.
