ახალქალაქის მუნიციპალიტეტის სოფელ ვაჩიანში ერთი შენობა ერთდროულად როგორც კლუბს, ასევე სარიტუალო სახლს ემსახურება. ეს „ორი ერთში“ შენობა ნახევრად დანგრეული მდგომარეობაშია. წელს „მხარდაჭერა სოფელს“ პროგრამით გამოყოფილი თანხა ამ შენობის აღდგენას დაეთმობა.
გარედან პატარა შენობას ჰგავს, მაგრამ შიგნით არის უზარმაზარი დარბაზი ხის სცენით. ეს ფართი სოფელში მასობრივი ღონისძიებების ჩასატარებლად გამოიყენება. ამგვარად, 9 მარტს ვაჩიანში ქორეოგრაფის ნასლეტ კეიანის ძალისხმევით ხალხური ცეკვების ფესტივალი მოეწყო.
ანსამბლმა „ვაჩიანმა“ მუშაობა 2009 წელს დაიწყო. მას შემდეგ ანსამბლის დირექტორი და ქორეოგრაფი ცდილობს ბავშვებს ხალხური ცეკვა გააცნოს. ზოგჯერ ანსამბლის მოცეკვავეები დადიან კონცერტებზე და ფესტივალებზე, რაც მათ საშუალებას აძლევს გააფართოვონ თავიანთი ჰორიზონტი შეზღუდული კულტურული ცხოვრებისა და სოფლებში კლასგარეშე განათლების არარსებობის პირობებში. კლუბის ერთ-ერთი ოთახი მინიმალურ დონეზე მოწესრიგდა და იქ ანსამბლი კვირაში რამდენჯერმე ატარებს რეპეტიციებს.
Посмотреть эту публикацию в Instagram
ახალქალაქის მუნიციპალიტეტის სხვა დანგრეულ სოფლის კლუბებთან შედარებით, სოფელ ვაჩიანის კლუბი შედარებით კარგ მდგომარეობაშია. ამის მიუხედავად, ცეკვის დროს სცენა ირხევა, კედლები კი მოცეკვავეებთან ერთად „ცეკვავენ“. კონცერტების დროს სცენას სპეციალურად ასველებენ, რათა შემცირდეს მტვერი. ფანჯრები დაფარულია შავი ბრეზენტებით, ხოლო განათებას რამდენიმე ნათურისგან შედგება, რომლებიც ძლივს უზრუნველყოფენ საჭირო შუქს. მიუხედავად ყველა ამ მოუხერხებელი პირობისა, კლუბი/სარიტუალო სახლი თბილია, რადგან გათბობა მუშაობს. არის სკამები, ხოლო სცენის ზემოთ კედელს ამშვენებს ანსამბლის უზარმაზარი პლაკატი, რაც იმაზე მიუთითებს, რომ ცდილობენ ხშირად გამოიყენონ ფართი.
როგორც ადგილობრივი ხელისუფლება ამტკიცებს, სოფლიდან ქველმოქმედები შენობის გარემონტება დაპირდნენ, მაგრამ ეს არ მოხდა. ამიტომ, წელს ვაჩიანის მოსახლეობამ გადაწყვიტა, „ მხარდაჭერა სოფელს“ პროგრამით გამოყოფილი თანხა მთლიანად კლუბის შენობის/სარიტუალო სახლის რეაბილიტაციისთვის გამოეყენებინათ. ასევე არ არის გამორიცხული, რომ ადგილობრივმა ხელისუფლებამ ამ თანხას დაამატოს ფინანსები, რათა სარეკონსტრუქციო სამუშაოები დასრულდეს.
„ვაჩიანმა „მხარდაჭერა სოფელს“ პროგრამით გამოყოფილი თანხა საზოგადოებრივი ცენტრის რეაბილიტაციისთვის გამოიყენა. „მხარდაჭერა სოფელს“ პროგრამით გამოყოფილი თანხა 20000 ლარს შეადგენს, მაგრამ ჩვენ ამის 200%-მდე გაზრდის შესაძლებლობა გვაქვს. ეს ნათელი გახდება მაშინ, როცა პროექტი იქნება შედგენილი, და განვსაზღვრავთ რამდენის დამატებაა საჭირო. თანხის გაზრდას ვგეგმავთ, შარშანაც, და წელსაც, როცა ვხედავთ, რომ „მხარდაჭერა სოფელს” პროგრამის სამუშაოები არ არის დასრულებული, თანხას ვამატებთ – ეს იქნება 100, 150 თუ 200%. კლუბის რეაბილიტაცია შესაძლოა „მხარდაჭერა სოფელს” პროგრამის თანხით დასრულდეს, შესაძლოა, 30 000 ან 45 000 ლარის დამატება იყოს საჭირო. თუ თანხა ნაკლები იქნება, სამუშაოებს ჩვენ დავასრულებთ, მაგრამ თუ მეტი იქნება, მაგალითად, 100 000 ლარი, მერე გადავწყვეტთ, რა გავაკეთოთ”,- თქვა ახალქალაქის მუნიციპალიტეტის ინფრასტრუქტურის, არქიტექტურის და მშენებლობის სამსახურის უფროსმა არა მოვსისიანმა.
სწორად გამოყენების შემთხვევაში, სოფლის კლუბები შეიძლება გახდეს კულტურული ცხოვრების ცენტრები, სადაც ტარდება კონცერტები, ფესტივალები, გამოფენები, რეპეტიციები და სხვა ღონისძიებები, რაც ხელს უწყობს ადგილობრივი ტრადიციებისა და წეს-ჩვეულებების შენარჩუნებას და განვითარებას. ეს ადგილი შეიძლება გახდეს ადგილობრივი მოსახლეობის, განსაკუთრებით ახალგაზრდების შემოქმედებისა და თვითგამოხატვის საფუძველი. კლუბები შეიძლება იყოს სხვადასხვა საგანმანათლებლო ღონისძიებების ჩატარების ადგილი – წრეები, მასტერკლასები, ლექციები, კურსები, რომლებიც ხელს უწყობენ პიროვნულ ზრდას და აფართოებენ სოფლის მოსახლეობის ჰორიზონტს. ეს განსაკუთრებით მნიშვნელოვანია სოფლის დასახლებაში კლასგარეშე განათლების შეზღუდული ხელმისაწვდომობის პირობებში. თუმცა მუნიციპალიტეტის სოფლის კლუბების უმეტესი ნაწილის დანგრეული მდგომარეობის გამო სოფლის მოსახლეობა ამ შესაძლებლობებს მოკლებულია.
